İqtisadiyyat Nazirliyi yanında Dövlət Vergi Xidməti (DVX) cəbhəyanı bölgələrdə fəaliyyət göstərən mikrosahibkarlara vergi güzəştlərinin verilməsinə dair qərar qəbul edib. Bu barədə DVX-nin məlumatında deyilir.
“Ötən müddət ərzində cəbhəyanı bölgələrdə yerləşən mülki obyektlərlə yanaşı, çoxsaylı sahibkarlıq obyektləri də düşmən zərbələrinə məruz qalıb. Həmin ərazilərdə qeydiyyatda olan bir sıra vergiödəyicilərinin təsərrüfat subyektlərinə, əmlaklarına külli miqdarda zərər dəyib, onların sahibkarlıq fəaliyyəti tamamilə dayanıb və ya əhəmiyyətli dərəcədə maliyyə itkiləri ilə üzləşiblər. İşğal altında olan rayonlarda və cəbhəyanı ərazilərdə qeydiyyatda olan mikro və kiçik sahibkarlıq subyektlərinə baş vermiş hadisələr nəticəsində dəymiş maddi zərərin təsirinin azaldılması, sahibkarlıq fəaliyyətinin davamlılığının təmin edilməsi məqsədilə həmin subyektlərə münasibətdə Dövlət Vergi Xidməti tərəfindən müvafiq qərar qəbul edilib. Belə ki, bu vergiödəyiciləri üzrə maliyyə sanksiyalarının tətbiq edilməsini nəzərdə tutan qərarlar tam şəkildə, səyyar vergi yoxlamalarının nəticəsi üzrə qəbul olunmuş qərarların isə maliyyə sanksiyasının tətbiq edilməsi hissəsi ləğv edilib”, - deyə məlumatda bildirilir.
Qəbul edilmiş qərarla 2013 vergiödəyicisinin 6 milyon 544,3 min manat ($3,85 milyon) məbləğində, o cümlədən tam və qismən işğal altında olan rayonlar üzrə 191 vergiödəyicisinin 103 min manat, cəbhəyanı rayonlar üzrə isə 1822 vergiödəyicisinin 6 milyon 441,4 min manat məbləğində maliyyə sanksiyası ləğv olunub.*
Ə.Məmmədov