Dağlıq Qarabağda atəşkəs rejiminə riayət edilir. Bunu Rusiyanın müdafiə naziri Sergey Şoyqu bu gün Bakıda Azərbaycan Prezidenti İlham Əliyevlə görüşdə deyib.
"Köçkünlərin qayıtması başlanıb. Əlbəttə, nizamlanmış bütün işlər bu gün öz nəticələrini verir. Atəşkəs rejiminə riayət edilir və mən əminəm ki, bundan sonra da belə olacaq", - deyə Şoyqu bildirib.
“Sizə təşəkkür edirəm ki, bizimlə görüşmək, bir qismi təcili, əksəriyyəti aktual, ümdə olan məsələlərin müzakirə edilməsi üçün vaxt tapmısınız. Zaman dinamik hərəkət edir, sürətlə keçir. Rusiya, Azərbaycan və Ermənistan dövlətlərinin rəhbərləri tərəfindən plan, mənim fikrimcə, tarixi Bəyanat qəbul ediləndən sonra o qədər də çox vaxt keçməyib, lakin sülhməramlı kontingent, sülhməramlı qüvvələr müəyyən edilmiş mövqeləri tutublar, yəni orada 23 post var. Təmas xəttində təhlükəsizliyi təmin etmək üçün magistral tərəfdə yerləşən bu postlar nəzarətə götürülüb”, - deyə o qeyd edib.
Öz növbəsində, Əliyev diqqətə çatdırıb ki, Dağlıq Qarabağla bağlı bəyanat yerinə yetirilir.
"Bu gün biz Rusiya Prezidenti, Azərbaycan Prezidenti və Ermənistanın baş naziri tərəfindən imzalanmış üçtərəfli Bəyanatın yerinə yetirilməsi ilə bağlı məsələləri müzakirə edəcəyik. Bizim fikrimizcə, Bəyanatın müddəaları uğurla həyata keçirilir və bu, həm Azərbaycan tərəfin, həm də Ermənistan tərəfin çoxillik münaqişəyə son qoymağa və siyasi nizamlama mərhələsinə çıxmağa hazır olduğunu bir daha nümayiş etdirir", - deyə Azərbaycan Prezidenti bildirib.
"Sizə, həmçinin Rusiyanın rəhbərliyinə, prezident Vladimir Vladimiroviç Putinə bu mühüm siyasi sənədin hazırlanmasında və qəbul edilməsində şəxsən fəal iştirak etdiyinə görə təşəkkürümü bildirmək istərdim", - deyə Əliyev qeyd edib.
RF müdafiə naziri Bakıya prezident Vladimir Putinin tapşırığı ilə gəlib. Şoyqu Azərbaycan Prezidenti tərəfindən qəbul edilib, müdafiə naziri Zakir Həsənovla danışıqlar aparıb.*