Prezident İlham Əliyev hesab edir ki, ordunun müasir silahlarla təchiz edilməsi İkinci Qarabağ müharibəsində qələbəni şərtləndirib.
"Biz o silahları alırdıq ki, bu silahlar bizim üstünlüyümüzü təmin etsin və İkinci Qarabağ müharibəsi bunu göstərdi. Biz ordumuzu inkişaf etdirərkən ən qabaqcıl meyilləri nəzərdən keçirmişdik. Biz lazım olan texnikanı aldıq. Bu amillər gücümüzü artırdı, qələbəmizi şərtləndirdi”, - deyə dövlət başçısı noyabrın 23-də işğaldan azad edilmiş Ağdam şəhərinə səfəri zamanı bildirib.
Əliyevin çıxışının mətni bu gün dövlət başçısının rəsmi saytında dərc olunub.
Onun sözlərinə görə, bu illər ərzində Azərbaycan hökuməti ordunun təchizatı məsələsinə xüsusi diqqət yetirib.
“Mən dəfələrlə demişdim ki, bizim üçün hərbi gücümüzün möhkəmləndirilməsi birinci məsələdir. Təsadüfi deyil ki, mənim prezidentlik dövrümdə bizim hərbi xərclərimiz hər il büdcə xərcləri arasında birinci yerdə idi. Mən deyirdim və ya vətəndaşlara izah edirdim ki, bəli, bizim çoxlu başqa məsələlərimiz var, həllini gözləyən problemlər var. Ancaq bizim əsas problemimiz torpaqlarımızın işğal altında olmasıdır. Ona görə bizim xərclərimiz arasında birinci yerdə hərbi xərclər dayanır”, - deyə prezident qeyd edib.
“Eyni zamanda, biz ordumuzun döyüş potensialını gücləndirirdik. Çünki tam aydın idi ki, təkcə silahlarla qələbə qazanmaq mümkün deyil. Bizim əsgər və zabitlərimiz aslan kimi vuruşdular. Şəhidlər verdik. Yaralı hərbçilərimiz var, onlar da sağalırlar. Onların bir çoxu artıq sağalıb. Biz qəhrəman əsgər və zabitlərimiz hesabına qələbə qazanmışıq. Təkcə Şuşanın işğaldan azad edilməsi əməliyyatı, əminəm ki, tarixdə əbədi qalacaq. Demək olar ki, yüngül silahlarla dərədən, meşələrdən, dağlardan keçərək əlbəyaxa döyüşdə düşməni məhv etdik, Qarabağın tacı olan Şuşanı azad etdik”, - deyə İ.Əliyev vurğulayıb.*
X.Nəsirzadə