İslam Əməkdaşlığı Təşkilatının (İƏT) Xarici İşlər Nazirləri Şurası 47-ci iclasın yekunlarına dair Ermənistanın Azərbaycana qarşı təcavüzü ilə bir sıra qətnamələr qəbul edib.
Azərbaycan Xarici İşlər Nazirliyinin məlumatında qeyd olunur ki, xüsusilə “Ermənistan Respublikasının Azərbaycan Respublikasına qarşı təcavüzü” adlı qətnamə qəbul edilib. Qətnamədə 2020-ci il 27 sentyabrdan noyabrın 9-dək Ermənistanın Azərbaycana qarşı yeni təcavüzü, təcavüz çərçivəsində mülki şəxslərə və mülki infrastruktura böyük zərərin vurulması, Gəncə, Bərdə, Tərtər şəhərlərinin sıx yaşayış məskənlərinin ağır artilleriya, ballistik və kaset raketlərinin hücumuna məruz qalmasını qətiyyətlə pislənilib.
Bundan başqa, Dağlıq Qarabağ münaqişəsi zonasında hərbi əməliyyatların dayandırılması üzrə Azərbaycan və Rusiya prezidentləri və Ermənistanın baş nazirinin üçtərəfli bəyanatı İƏT-ə üzv ölkələri tərəfindən alqışlanıb.
O cümlədən, İƏT-ə üzv ölkələrin XİN başçıları “Azərbaycan Respublikasına iqtisadi yardım” adlı qətnamə qəbul ediblər. Qətnamədə İslam İnkişaf Bankı və digər İslam institutlarına işğaldan azad olunan ərazilərin yenidən qurulması və bərpasında Azərbaycan hökumətinə və xalqına yardım etməyə çağırış öz əksini tapır. Burada, habelə bütün beynəlxalq institutlar Azərbaycanın iqtisadi və sosial inkişaf fəaliyyətini dəstəkləməyə çağırılır.
İclasın yekunları üzrə nazirlər “Ermənistan Respublikasının Azərbaycan Respublikasına təcavüzü nəticəsində Azərbaycanın işğal olunmuş ərazilərində İslam tarixi və mədəni ziyarətgahlarının dağıdılması və təhqir edilməsi” adlı qətnamə qəbul ediblər. Qətnamədə Azərbaycanın işğal olunmuş ərazilərindəki İslam tarixi və mədəni abidələrinin, ziyarətgahlarının dağıdılması, talan edilməsi, oğurlanması, qanunsuz yerdəyişməsi və ya mənimsənilməsi, eləcə də bu obyektlərə qarşı vandallıq aktlarının törədilməsi qətiyyətlə pislənilir, yenicə azad olunmuş ərazilərdə yerləşən məscidlərin Ermənistan tərəfindən təhqir olunması şiddətlə qınanılır. Həmçinin, İƏT-ə üzv ölkələrinin XİN başçıları Azərbaycanın ona dəymiş zərərə görə təzminat tələb etmək haqqı, Ermənistanın isə bu təzminatı ödəmək məsuliyyətini təsdiq ediblər. **
R.Əhmədov