2020-ci ilin 11 ayı ərzində Kənd Təsərrüfatı Nazirliyi yanında Aqrar Kredit və İnkişaf Agentliyinin (AKİA) xətti ilə fermerlərə ümumilikdə 65,4 milyon manat məbləğində kredit ayrılıb.
“2020 ilin 11 ayı ərzində kənd təsərrüfatı məhsulları istehsalçılarına 65,4 milyon manat kredit ayrılıb. Bu vəsaitin 33,4 milyon manatı kənd təsərrüfatı texnikası və damazlıq heyvanların güzəştli şərtlərlə maliyyələşdirilməsi üçün ayrılan kreditlərdir”, - deyə AKİA-nın məlumatında bildirilir.
Ayrılan kredit vəsaitinin 20,6 milyon manatı mikrokreditlərin payına düşüb. Mikrokreditlərdən 2,2 min nəfərdən artıq fermer faydalanıb. Qalan vəsaitin 11,4 milyon manatı digər təyinatlı kreditlərdir.
Bundan başqa, hesabat dövründə fermerlərin texnika və damazlıq heyvan almasına AKİA tərəfindən 75,7 milyon manatdan artıq subsidiya verilib.
Aqrar Kredit və İnkişaf Agentliyinin vəsaitləri hesabına fermerlərə mikrokreditlər 12%, nağd pul və digər kənd təsərrüfatı təyinatlı kreditlər 7%-lə verilir. Kənd təsərrüfatı məhsulları istehsalçılarının aldıqları damazlıq heyvanın qiymətinin 60%-i, texnikanın qiymətinin isə 40%-i dövlət tərəfindən ödənilir.
Prezident İlham Əliyev 2020-ci ilin aprel ayında koronavirus pandemiyası şəraitində və sonrakı dövrdə kənd təsərrüfatı məhsulları istehsalçılarının mikrokreditlərlə təminatının yaxşılaşdırılması üçün vəsait ayrılması haqqında sərəncam imzalayıb. Sərəncama əsasən, bu məqsədlə Aqrar Kredit və İnkişaf Agentliyinə 30 milyon manat ayrılıb.
Mikrokreditlərin maksimal həddi 15 min manat, müddəti 3 il, illik faiz dərəcəsi 12% təşkil edir.*
X.Nəsirzadə