Azərbaycan prezidenti İlham Əliyev çərşənbə axşamı xalqa müraciətində Laçın rayonunun erməni işğalından azad edilməsi barədə elan edib.
“Böyük sevinc hissi ilə bildirirəm ki, Laçın rayonu işğaldan azad olundu. Bütün Azərbaycan xalqını bu münasibətlə ürəkdən təbrik edirəm. Laçın rayonunun işğaldan azad olunması tarixi hadisədir. Özü də bir güllə atmadan biz Laçın rayonunu qaytardıq. Düşməni buna məcbur etdik. Döyüş meydanında əldə edilmiş parlaq qələbə bu gözəl nəticəyə gətirib çıxardı ki, üç rayonumuz – Ağdam, Kəlbəcər və Laçın bizə qaytarıldı. Biz bu rayonları bir güllə atmadan qaytarmışıq”, - Əliyev qeyd edib.
Həmçinin, prezident qeyd edib ki, işğal altında olan illər ərzində Laçın rayonunun qaçqın statusunda olan əhalisi 80 min nəfərə çatıb.
“Laçın işğal olunanda bu rayonda təqribən 50 mindən bir qədər çox əhali yaşayırdı. İndi Laçın rayonunun əhalisi 80 min nəfərə çatıb. Əlbəttə ki, laçınlıları qısa müddət ərzində Laçına qaytarmaq bizim əsas vəzifələrimizdən biri olacaqdır. Həmçinin biz çalışacağıq ki, keçmiş məcburi köçkünləri işğaldan azad edilmiş bütün digər rayonlarımıza qısa müddət ərzində qaytaraq”, - Əliyev vurğulayıb.
Həmçinin, dövlət başçısı Laçın rayonunun xüsusiyyətini ayrıca qeyd edərək, bildirib ki, bu, ən böyük və zəngin rayonlardan biridir.
“Laçın rayonu ölkəmizin ən böyük rayonlarından biridir, ərazisi 1,8 min kvadrat kilometrdir. Laçın rayonunun zəngin təbiəti, tarixi abidələri, yeraltı sərvətləri bizim milli sərvətimizdir. Laçın rayonunun Azərbaycanın gələcək iqtisadi inkişaf işlərində mühüm rolu olacaq”, - Əliyev vurğulayıb. **
X.Nəsirzadə