Azərbaycan prezidenti İlham Əliyev bazar ertəsi “Qarabağ Dirçəliş Fondu” publik hüquqi şəxsin yaradılması haqqında fərman imzalayıb. Bu barədə dövlət başçısının saytında məlumat verilir.
Fond Azərbaycan Respublikasının işğaldan azad edilmiş ərazilərinin bərpası və yenidən qurulması, habelə dayanıqlı iqtisadiyyata və yüksək rifaha malik regiona çevrilməsi istiqamətində həyata keçirilən tədbirlərə maliyyə dəstəyi göstərilməsini və sərmayələrin cəlb edilməsini, bu sahədə dövlət-özəl tərəfdaşlığının inkişafını təmin edən, eləcə də ölkə daxilində və ölkə xaricində zəruri təşviqat işlərini həyata keçirəcək.
Fondun fəaliyyətinə ümumi rəhbərliyi və nəzarəti Müşahidə Şurası həyata keçirəcək.
Fondun fəaliyyətinə cari rəhbərliyi üç üzvdən – sədr və onun iki müavinindən ibarət İdarə Heyəti həyata keçirəcək.
Fondun vəsaitləri aşağıdakı mənbələr hesabına formalaşır: fiziki və hüquqi şəxslərin ianələri; qrantlar və qanunla qadağan olunmayan digər mənbələr. Fond dövlət qeydiyyatına alınanadək nəzərdə tutulan vəsait Fondun xüsusi xəzinə və bank hesablarında toplana bilər.
Azərbaycan Respublikası Prezidentinin Administrasiyasına 15 gün müddətində Fondun nizamnaməsinin layihəsini hazırlayıb Azərbaycan prezidentinə təqdim etmək tapşırılıb.
Nazirlər Kabinetinə Fondun dövlət qeydiyyatına alınması üçün onun nizamnaməsi təsdiq edildikdən sonra üç gün müddətində “Hüquqi şəxslərin dövlət qeydiyyatı və dövlət reyestri haqqında” Azərbaycan Respublikasının Qanunu ilə müəyyən edilmiş qaydada tədbirlər görmək; dövlət qeydiyyatına alındığı gündən Fondun inzibati bina ilə təmin olunması və maddi-texniki təminatı məsələlərinin həlli üçün bir ay müddətində tədbirlər görmək tapşırılıb.
Maliyyə Nazirliyinə Fond fəaliyyətə başlayanadək Fondun vəsaitinin xüsusi xəzinə və bank hesablarında toplanmasını təşkil etmək; Fondun fəaliyyətinin təşkili və təmini üçün tələb olunan vəsaiti hər il üçün dövlət büdcəsinin layihəsində nəzərdə tutmaq; bu fərmandan irəli gələn digər məsələləri həll etmək tapşırılır.
O cümlədən, prezident İlham Əliyev Qarabağ Dirçəliş Fondunun Müşahidə Şurasının tərkibini təsdiq edib. Fondunun Müşahidə Şurasının aşağıdakı tərkibi təsdiq edilib: iqtisadiyyat naziri Mikayıl Cabbarov, ekologiya və təbii sərvətlər naziri Muxtar Babayev, Azərbaycan Respublikasının Qaçqınların və Məcburi Köçkünlərin İşləri üzrə Dövlət Komitəsinin sədri Rövşən Rzayev, Dağlıq Qarabağın Azərbaycanlı İcması İctimai Birliyinin sədri, Azərbaycan Respublikası Milli Məclisinin deputatı Tural Gəncəliyev, Milli Məclisinin deputatı Fatma Yıldırım, Bakı Musiqi Akademiyasının rektoru Fərhad Bədəlbəyli, Azərbaycan Dövlət İqtisad Universitetinin rektoru Ədalət Muradov, Azərbaycan Dillər Universitetinin rektoru Kamal Abdulla, Azərbaycan Respublikasının xalq artisti Alim Qasımov. **
N.Abbasova