Ermənistan rəsmilərinin Dağlıq Qarabağa səfərləri davam edərsə, bu ölkəni sərt cavab tədbirləri gözləyir. Bunu Prezident İlham Əliyev deyib.
“İndi mənə məlumat verildi ki, Ermənistanın xarici işlər naziri Xankəndiyə gedib. Sənin orada nə işin var? Müharibə onların yadından çıxmasın. Unutmasınlar ki, dəmir yumruq yerindədir. Bu səfərlərə son qoyulmalıdır. Biz xəbərdarlıq edirik, əgər belə təxribat xarakterli addımlar atılacaqsa, Ermənistan daha da peşman olacaq”, – deyə dövlət başçısı 2020-ci ilin yekunlarına həsr olunmuş müşavirədə bildirib.
Onun sözlərinə görə, heç bir xarici vətəndaş, heç bir beynəlxalq təşkilat - Qırmızı Xaç istisna olmaqla, Azərbaycanın icazəsi olmadan Dağlıq Qarabağa gedə bilməz.
“Ermənistanın xarici işlər naziri, sən kimsən ki, oraya gedirsən? Otursun öz ölkəsində. Bu, bizim ərazimizdir. Bütün dünya bu ərazini Azərbaycanın ayrılmaz hissəsi kimi tanıyır. Heç bir xarici vətəndaş bizim icazəmiz olmadan o əraziyə gedə bilməz. Heç bir beynəlxalq təşkilat, - ancaq Qırmızı Xaç istisna olmaqla, - oraya gedə bilməz. Elə birinci dəfə biz Xarici İşlər Nazirliyi vasitəsilə onlara xəbərdarlıq etdik. Ondan sonra xəbərdarlıq başqa cür veriləcək”, - deyə İ.Əliyev vurğulayıb.
Prezident qeyd edib ki, müharibədən sonra Rusiyanın vasitəçiliyi ilə münasibətlərin normallaşdırılması fonunda Ermənistan rəsmilərinin bu cür təxribat xarakterli əməlləri qətiyyən qəbuledilməzdir.
“İndi münasibətlərin normallaşdırılması istiqamətində addımlar atılır. Rusiya öz vasitəçilik imkanlarını tərəflərə təqdim edib. Bu yaxınlarda Ermənistana və Azərbaycana səfər etmiş Rusiya hökumət nümayəndələrindən ibarət heyət əsasən bu mövzular haqqında söhbətlər aparmışdır. Yaxşı, əgər münasibətlər normallaşacaqsa, o zaman belə təxribat xarakterli “səfərlərə” nə ehtiyac var? Nəyi göstərmək istəyirlər? Yenəmi bizi qıcıqlandırmaq istəyirlər? Unutmasınlar ki, onlara çox baha başa gəldi bu tipli addımlar”, - deyə İ.Əliyev əlavə edib.*
X.Nəsirzadə