Baş nazir Əli Əsədov bu gün “Azərbaycan Respublikasında COVID-19 xəstəliyi əleyhinə 2021-2022-ci illər üçün Vaksinasiya Strategiyası”nı təsdiq edib. Bu barədə “İnterfaks-Azərbaycan” agentliyinə hökumətdən məlumat verilib.
“Strategiyanın məqsədi hazırda geniş yayılmış COVID-19 xəstəliyinin vaksinasiya ilə qarşısının alınmasına, bununla xəstələnmə və ölüm səviyyəsinin aşağı enməsinə nail olmaqdır”, - deyə sənəddə qeyd olunur.
Strategiyaya əsasən, 1-ci mərhələdə səhiyyə işçiləri, 65 yaşdan yuxarı şəxslər və hüquq mühafizə orqanları tərəfindən əksepidemik tədbirlərə cəlb olunan heyət vaksinasiya olunacaq.
2-ci mərhələdə tibbi yüksək riskli olanlar (tənəffüs sistemi, hemodializ, şəkərli diabet, piylənmə kimi xroniki xəstəlikləri olanlar), 50 yaş və daha yuxarı ən az bir xroniki xəstəliyi olan şəxslər, təhsil və sosial sektorda çalışanlar, sosial müəssisələrdə daimi yaşayanlar, ASAN Xidmət və DOST mərkəzləri, ictimai nəqliyyat sektorunun, telekommunikasiya operatorları və provayderlərinin və poçt sahəsində birbaşa əhali ilə təmasda olan işçilərin və bank sektorunun birbaşa əhali ilə təmasda olan hissəsi, yüksək riskli şəraitli işlərdə (cəmiyyətin fəaliyyəti üçün həyati vacib sahələrdə çalışan və əhəmiyyətli dərəcədə daha yüksək riskli sahələrdə çalışan – milli və regional təhlükəsizlik, ədliyyə, maliyyə və s.) şəxslər vaksinasiyaya cəlb olunacaq.
Vaksinlərin alınması üçün ödənişlər Azərbaycan Respublikasının Koronavirusla Mübarizəyə Dəstək Fondunda toplanılmış vəsaitlər, vaksinasiyaya dair digər tədbirlərin keçirilməsi üçün ödənişlər isə müvafiq illər üzrə Azərbaycan Respublikasının dövlət büdcəsinin mərkəzləşdirilmiş xərclərinin “Səhiyyə” bölməsində nəzərdə tutulmuş vəsait hesabına həyata keçiriləcək. Strategiyanın maliyyələşdirilməsi üçün qanunvericiliklə qadağan olunmayan digər maliyyə mənbələrindən də istifadə edilə bilər.
Yanvarın 18-dən Azərbaycanda koronavirusa qarşı vaksinasiya prosesinə başlanılacaq. İlk olaraq tibb işçiləri vaksinasiya olunacaq və bu proses 1-1,5 həftə davam edəcək. Fevralın 1-dən isə yaşı 65-dən yuxarı olan şəxslərə vaksin vurulacaq.
Səhiyyə Nazirliyinin məlumatına görə, 2021-ci ildə Azərbaycana COVAX platforması çərçivəsində 2 milyon doza vaksin gətiriləcək. Eyni zamanda, Çinin “Sinovac” şirkətinə 4 milyon doza vaksin sifariş edilib.
Hazırda Azərbaycanda koronavirus infeksiyasına yoluxma hallarının ümumi sayı 226,951 min, ölənlərin ümumi sayı 2998 nəfər, yoluxanların sayı 214,423 min nəfər, aktiv xəstə sayı 9 min 530 nəfərdir.*
N.Abbasova