Azərbaycan hökuməti koronavirus (COVID-19) pandemiyası ilə mübarizə tədbirlərinə 2020-ci il dövlət büdcəsindən 1 milyard 985,6 milyon manat (cari məzənnə ilə $1 milyard 168 milyon) vəsait ayırıb. Bu barədə “İnterfaks-Azərbaycan” agentliyinə Maliyyə Nazirliyindən məlumat verilib.
“Həmin vəsaitdən 612,5 milyon manatı koronavirusla mübarizə tədbirlərində iştirak edən tibb işçilərinə əlavənin ödənilməsinə, zəruri tibbi ləvazimatların və avadanlıqların, dərman vasitələrinin alınmasına, çarpayı fondunun artırılması və ixtisaslaşmış xəstəxanaların fəaliyyətlərinin təmin edilməsinə, karantin nəzarətinə götürülmüş şəxslərə karantin müəssisələrində göstərilən xidmətlərlə bağlı xərclərin ödənilməsinə yönəldilib”, - deyə məlumatda bildirilir.
Bununla yanaşı, qlobal pandemiya ilə bağlı dünya enerji və səhm bazarlarında baş verən kəskin dalğalanmaların Azərbaycan Respublikasının iqtisadiyyatına, makroiqtisadi sabitliyə, ölkədə məşğulluq məsələlərinə, sahibkarlıq subyektlərinə mənfi təsirinin azaldılması ilə bağlı tədbirlərin maliyyələşdirilməsi üçün 1 milyard 334,1 milyon manat vəsait sərf olunub.
“2020-ci il ərzində koronavirus pandemiyası ilə bağlı beynəlxalq miqyasda tədbirlərin dəstəklənməsi məqsədilə 39,3 milyon manat məbləğində, o cümlədən Ümumdünya Səhiyyə Təşkilatına 17 milyon manat, UNESCO və İCESCO təşkilatlarına 3,4 milyon manat və 18 xarici ölkəyə 18,9 milyon manat beynəlxalq yardımlar göstərilib”, - deyə məlumatda qeyd olunur.
Xəbər verildiyi kimi, 2020-ci ildə Azərbaycanda ÜDM-in həcmi 72 milyard 432,2 milyon manat təşkil edib. Beləliklə, koronavirus pandemiyası ilə mübarizə tədbirlərinin 2020-ci il dövlət büdcəsindən maliyyələşdirilmə həcmi ÜDM-in 2,7%-nə bərabər olub.*
A.Əzizov, Ə.Məmmədov