Azərbaycan qısamüddətli dayanmadan sonra “Şahdəniz” yatağından qaz ixracını bərpa edib. Bu barədə "İnterfaks-Azərbaycan" agentliyinə SOCAR-ın İctimaiyyətlə əlaqələr və tədbirlərin təşkili İdarəsinin rəis müavini İbrahim Əhmədov məlumat verib.
"Söhbət ixracın qısamüddətli dayanmasından gedir. Səbəb bir neçə saat ərzində aradan qaldırılıb və qazın ixrac sisteminə ötürülməsi bərpa edilib", - deyə Əhmədov bildirib.
Daha əvvəl KİV-in Türkiyənin Enerji Birjasına (EPİAS) istinadən yaydığı məlumata görə, Azərbaycanın qaz quyularında (“Şahdəniz” yatağında) yaranmş texniki nasazlıq səbəbindən fevralın 23-də Türkiyəyə təbii qazın nəqli dayandırılıb.
Hazırda “Şahdəniz” yatağından hasil edilən qaz Gürcüstana və əsasən də Türkiyəyə ixrac olunur. Bununla yanaşı, Azərbaycan Türkiyəyə yalnız bu yataqdan qaz tədarük edir.
“Şahdəniz” yatağının işlənməsi haqqında müqavilə 1996-cı il iyunun 4-də Bakıda imzalanıb və elə həmin il oktyabrın 17-də Milli Məclisdə ratifikasiya edilib. “Şahdəniz” layihəsinin iştirakçıları BP (operator – 28,8%), “Petronas” (15,5%), SOCAR (16,7%), LUKOİL (10%), NICO (10%) və TPAO (19%) şirkətləridir.
Hazırda “Şahdəniz” yatağından qaz hasilatı “Mərhələ-1” çərçivəsində “Alfa” və “Mərhələ-2” çərçivəsində “Bravo” platformalarından həyata keçirilir.*
N.Abbasova