Ermənistanın hakim partiyasında hesab edirlər ki, baş nazir Nikol Paşinyanın təklifini qəbul etməyərək Baş Qərargah rəisi Onik Qasparyanı vəzifəsindən azad etməkdən imtina edən prezident Armen Sarkisyanın impiçment prosesinin başlanılması üçün bütün əsaslar var.
“Ermənistan Konstitusiyasının 139-cu maddəsinə əsasən, prezident təkliflə çıxış edən orqanın fərman layihəsini etirazla geri qaytarmaq hüququna malikdir. İlk baxışdan da dünən Baş Qərargah rəisinin vəzifəsindən azad edilməsi barədə fərman layihəsini baş nazirə geri qaytararkən prezident bu hüququndan istifadə edib. Ancaq əslində məsələ belə deyil. Prezident fərman layihəsini özbaşına qaytara bilməz”, - deyə “Mənim addımım” fraksiyasının deputatı Vaaqn Ovakimyan “Facebook” səhifəsində yazıb.
Onun sözlərinə görə, konkret olaraq bu halda baş nazir Konstitusiyanın 155-ci maddəsinə uyğun olaraq Baş Qərargah rəisinin vəzifədən azad olunmasını təklif edib və bu prosesdə Konstitusiyaya zidd element yoxdur.
“Biz əslində prezidentin səlahiyyətlərindən özbaşına istifadəni görürük ki, bu da yolverilməzdir. Beləliklə, prezident dövlət təhlükəsizliyini təhdid altında qoya və stabilliyi poza bilər. Buna görə də Konstitusiyanın 141-ci maddəsinin kobud surətdə pozulduğunu nəzərə alaraq prezidentin impiçment prosesinin başlanılması üçün bütün əsaslar var”, – deyə deputat qeyd edib.*