2020-ci ildə Azərbaycanda turistlərin yerləşdirilməsi və ictimai iaşə sektorunun ÜDM-də payı koronavirus (COVID-19) pandemiyası səbəbindən 1,2%-ə qədər azalıb. Bu barədə "İnterfaks-Azərbaycan" agentliyinə hökumətdən məlumat verilib.
"2020-ci ildə turistlərin yerləşdirilməsi və ictimai iaşə sektorunda əlavə dəyər istehsalı 821,1 milyon manat təşkil edib ki, bu da 2019-cu illə müqayisədə 58,9% azdır. Nəticədə sektorun ÜDM-də payı 1,2 faiz bəndi – 1,2%-ə qədər azalıb", - deyə hökumətin 2020-ci ilə dair hesabatında bildirilir.
Bununla yanaşı, 2018-ci ildə sektorda əlavə dəyər 7,6%, 2019-cu ildə 6,4% artıb.
2020-ci ildə bu sektorda əsas kapitala investisiyalar 62,8 milyon manat, azalma 2019-cu illə müqayisədə nominal ifadədə 5,9%, real ifadədə 29,4% təşkil edib.
Əsas kapitala investisiyaların ümumi həcmində turistlərin yerləşdirilməsi və qida sektorunun payı 0,4% təşkil edib.
Hökumətdən bildiriblər ki, 2020-ci ildə Azərbaycana 795,7 min turist gəlib ki, bu da 2019-cu illə müqayisədə 4 dəfə azdır. Bununla yanaşı, 2020-ci ilin yanvar-fevral aylarında ölkəyə 426,2 min turist gəlib ki, bu da 2019-cu ilin müvafiq dövrü ilə müqayisədə 17% çoxdur.
Hesabatda qeyd olunur ki, dünyanın digər ölkələrində olduğu kimi, Azərbaycanda da turizm sektoru koronavirus pandemiyasına görə ciddi ziyan çəkib.
"2020-ci ilin aprel-dekabr aylarında turist axınının əhəmiyyətli dərəcədə azalması qonşu ölkələrlə sərhədlərin bağlanması üzrə məhdudlaşdırıcı tədbirlərlə, eləcə də koronavirus infeksiyasının yayılmasına qarşı mübarizə məqsədilə bir çox xarici ölkələrdən uçuşlara qoyulan müvəqqəti məhdudiyyətlərlə bağlıdır. Bu dövrdə ölkəyə edilən səfərlər turizmlə bağlı olmayıb", - deyə hökumətdən vurğulayıblar.
Hesabata əsasən, ötən il ölkəyə gələn xarici turistlərin əksəriyyəti Rusiya (28,3%), Gürcüstan (23,2%), Türkiyə (20,2%) və İran (9,1%) vətəndaşları olub.
Bununla yanaşı, turistlərin böyük hissəsi (502,5 min nəfər) 36-65 yaşlı şəxslər (turistlərin ümumi sayının 63,2%-i), 231 min nəfəri (29%) 18-35 yaşlı şəxslər, 39,5 min nəfəri (5%) 18 yaşadək olan şəxslər, 22,7 min nəfəri (2,8%) 66 yaşdan yuxarı şəxslər olub.
Turistlərin 26,2%-i Azərbaycana 24 saat, 25%-i 28 gündən çox, 21,5%-i 1-3 gün, 19,1%-i 4-7 gün müddətinə gəlib.*
X.Nəsirzadə