Azərbaycan Respublikasının xarici işlər naziri Ceyhun Bayramov Azərbaycan sərhədlərinin pozulması və erməni hərbçilərin qanunsuz olaraq Qarabağda yerləşdirilməsi cəhdləri ilə bağlı BMT baş katibinə məktub ünvanlayıb.
“Ermənistan tərəfi 2020-ci il 10 noyabr tarixli üçtərəfli bəyanata zidd olaraq, Ermənistan silahlı qüvvələrinin şəxsi heyətini gizli şəkildə “Laçın dəhlizi” vasitəsilə və buradakı Rusiya sülhməramlılarının nəzarət proseduralarından yayınmaq məqsədilə mülki geyimdə və mülki nəqliyyat vasitələrində Azərbaycan ərazilərinə göndərib”, – deyə məktubda bildirilir.
Məktub BMT Baş Assambleyasının və Təhlükəsizlik Şurasının sənədi kimi yayılıb.
Məktubda qeyd olunur ki, bu fakt Ermənistanda hərbçilərin ailələrinin etirazına səbəb olub və müstəqil media tərəfindən qeydə alınıb.
Bayramov vurğulayıb ki, bu kimi addımlar bölgədə qeyri-sabitliyə xidmət edir.
Nazir, həmçinin qeyd edib ki, Ermənistan silahlı qüvvələrinin Azərbaycan Respublikasının beynəlxalq səviyyədə tanınmış ərazilərində yerləşdirilməsi Ermənistanın beynəlxalq öhdəliklərinin, xüsusilə də dövlətlərin suverenliyi və ərazi bütövlüyünə hörmət və riayət etmək öhdəliyinin kobud şəkildə pozulmasıdır.*
X.Nəsirzadə