2021-ci ilin yanvar-fevral aylarında Azərbaycanda 216 ədəd minik avtomobili istehsal edilib. Bu barədə “İnterfaks-Azərbaycan” agentliyinə Dövlət Statistika Komitəsindən məlumat verilib.
2020-ci ilin müvafiq dövrü ilə müqayisədə avtomobil istehsalı 55% azalıb.
Yanvarda 96, fevralda 120 ədəd avtomobil istehsal edilib.
1 mart 2021-ci il tarixinə anbarlarda 169 ədəd minik avtomobili var.
Fevral ayında Azərbaycanda traktor istehsalı bərpa olunub (yanvar ayında traktor istehsal olunmayıb). Hesabat ayında 51 ədəd traktor istehsal edilib ki, bu da 2020-ci ilin yanvar-fevral aylarının göstəricisindən 2% çoxdur.
Martın 1-nə anbarlarda 120 ədəd traktor var.
Azərbaycanda (Neftçala, Gəncə və Naxçıvanda) avtomobil istehsalı üzrə 3 zavod fəaliyyət göstərir. Eyni zamanda, Gəncə avtomobil zavodunda kənd təsərrüfatı texnikası da istehsal olunur. Hazırda avtomobil istehsalı yalnız Neftçala avtomobil zavodunda həyata keçirilir.
Ortamüddətli perspektivdə Azərbaycanda avtomobil istehsalının ildə 5 min ədədə çatdırılması nəzərdə tutulur.
2020-ci ildə Azərbaycanda 1,949 min ədəd avtomobil istehsal olunub ki, bu da 2019-cu ilin göstəricisindən 17,4% azdır. Ötən il respublikada 300 ədəd müxtəlif təyinatlı traktor (azalma 66,9%) istehsal edilib.*
B.Rüstəmbəyov