Azərbaycan Respublikasının Baş prokuroru Kamran Əliyev Qarabağ regionunda Azərbaycan jurnalistlərinin minaya düşməsi faktı ilə əlaqədar BMT-nin İnsan Hüquqları üzrə Ali komissarı, Avropa Şurasının İnsan Hüquqları üzrə komissarı, “Amnesty İnternational” və “Human Rights Watch” təşkilatlarına rəsmi müraciət ünvanlayıb.
Əliyev müraciətdə qeyd edib ki, Ermənistanın hərbi-siyasi rəhbərliyi Qarabağda işğaldan azad edilmiş ərazilərdə bastırdığı minaların xəritə və sxemlərini bugünədək Azərbaycana təqdim etməyib.
Baş prokuror bunu “Ermənistanın Azərbaycan xalqına qarşı törətmiş olduğu təxribat xarakterli aktların davamı kimi qiymətləndirir”.
“Ermənistan tərəfinin işğaldan azad edilmiş ərazilərimizdə uzun illər ərzində bastırdığı minaların xəritə və sxemlərini bugünədək təqdim etməməsi Ermənistan Respublikasının Azərbaycan xalqına qarşı törətmiş olduğu təxribat xarakterli aktların davamı kimi qiymətləndirilir. Ermənistan beynəlxalq hüquqdan irəli gələn öhdəlikləri əməl etməlidir”, - baş prokuror qeyd edib.
Əliyev vurğulayıb ki, bu xəritələri və digər zəruri məlumatları Ermənistanın təqdim etməkdən imtinası Azərbaycan əhalisinin İnsan Hüquqları üzrə Avropa Konvensiyasının 2-ci və 8-ci maddələri, 1 saylı Protokolunun 1-ci maddəsi, 4 saylı Protokolunun 2(1) və 3(2) maddələrindən irəli gələn hüquqlarının ciddi şəkildə pozulmasına səbəb olur.
Baş prokuror bildirib ki, 2020-ci il 10 noyabr tarixində üçtərəfli bəyanatın imzalandığı gündən etibarən Qarabağ regionunda minaya düşərək 20 mülki şəxs həlak olub, daha 29 nəfər bədən xəsarətləri alıb.
Baş prokuror müraciətində nüfuzlu beynəlxalq təşkilatları və dünya ictimaiyyətini “törədilmiş cinayətlərlə bağlı səlahiyyətləri çərçivəsində Ermənistan rəhbərliyinə qarşı tədbir görməyə” çağırıb. **
X.Nəsirzadə