Energetika naziri Pərviz Şahbazov və İsrail Respublikasının Azərbaycan Respublikasındakı fövqəladə və səlahiyyətli səfiri Corc Dik energetika sahəsində əməkdaşlığın daha da inkişaf etdirilməsi perspektivlərini müzakirə ediblər. Bu barədə Energetika Nazirliyinin məlumatında deyilir.
Görüşdə bildirilib ki, İsrail Azərbaycan üçün vacib tərəfdaş olduğu qədər, Azərbaycanda İsrailin enerji təhlükəsizliyi üçün biroqədər əhəmiyyət kəsb edən ölkədir və İsrailin neft idxalının əhəmiyyətli hissəsi Azərbaycanın payına düşür.
“Azərbaycanda energetika sahəsində, o cümlədən işğaldan azad olunmuş ərazilərdə həyata keçirilən layihələr və gələcək planlar barədə məlumat verilib, bərpa olunan enerji, enerji səmərəliliyi sahəsində qabaqcıl təcrübəyə və texnologiyalara malik İsrail şirkətləri ilə əməkdaşlıq üçün potensialın olduğu qeyd edilib. Gələcəkdə ölkəmizdə təşkil ediləcək bərpa olunan enerji hərraclarında İsrail şirkətlərinin də iştiraka təşviq edilməsinin əhəmiyyəti vurğulanıb”, - deyə məlumatda bildirilir.
Görüşdə müvafiq sahələr üzrə məlumat və təcrübə mübadiləsi, həmçinin qarşılıqlı maraq doğuran bir sıra digər məsələlər müzakirə edilib.*
B.Rüstəmbəyov