Dayazsulu “Abşeron” (Shallow Water Absheron Peninsula, SWAP) perspektiv sahəsində ilk kəşfiyyat quyusunun qazılmasına 2021-ci ilin III rübündə başlanılacaq. Bu barədə “İnterfaks-Azərbaycan” agentliyinə “BP-Azerbaijan” şirkətinin mətbuat xidmətindən məlumat verilib.
Daha əvvəl şirkət SWAP layihəsi çərçivəsində kəşfiyyat qazma işlərinə 2020-ci ilin sonunda başlamağı planlaşdırsa da, daha sonra bu proses 2021-ci ilin II rübünə qədər təxirə salınmışdı.
“Dayazsulu “Abşeron” perspektiv sahəsində birinci kəşfiyyat quyusunun qazılmasına cari ilin avqust ayında başlanılması planlaşdırılır”, - deyə məlumatda qeyd olunur.
Qazma işləri “Satti” özüqalxan üzən qazma qurğusu vasitəsilə aparılacaq.
BP qazma işlərinin yekunları üzrə sözügedən blokda neft ehtiyatlarının aşkarlanacağına ümid edir.
2016-cı ildə Abşeron arxipelaqının dayazsulu hissəsində seysmik tədqiqatlar aparılıb. Seysmik tədqiqatlar 1,52 min kvadratmetr ərazini əhatə edib. 90 kvadratmetr ərazi quruda tədqiq olunub. Seysmik işlərin yekunları üzrə Abşeron arxipelaqının dayazsulu hissəsində qazma işlərinin həyata keçirilməsi üçün 3 sahə seçilib.
2014-cü il dekabrın 22-də SOCAR ilə BP arasında Abşeron arxipelaqının ətrafındakı dayazsulu sahədə yerləşən potensial perspektiv strukturlarda birgə geoloji kəşfiyyat işlərinin aparılması və işlənməsi haqqında hasilatın pay bölgüsü sazişi imzalanıb.
Müqavilə sahəsi təxminən 1,9 min kvadratmetr təşkil edir. Saziş üzrə 50% pay BP şirkətinə, 50% pay isə SOCAR-a məxsusdur.
Saziş çərçivəsində işlər 3 mərhələyə bölünüb: ilkin kəşfiyyat, əsas kəşfiyyat, yataqların işlənməsi.
30 ay davam edəcək birinci mərhələ çərçivəsində BP 3D və 2D seysmik tədqiqat işləri həyata keçirməli, həmçinin işlərin bütün müqavilə sahəsində ətraf mühitə təsirini qiymətləndirməlidir. Əgər BP bu müddət ərzində perspektivli strukturlar aşkar edərsə, 4 bu cür struktur seçərək növbəti mərhələyə - əsas kəşfiyyata keçmək hüququna malikdir.
Müqaviləyə əsasən, ikinci mərhələnin reallaşdırılması 3 ilə qədər müddəti əhatə edə bilər.
Bu dövrdə BP seçilmiş strukturlarda mühəndis-geoloji tədqiqat aparmalı və həmin işlərin ətraf mühitə təsirinin qiymətləndirilməsinə dair hesabat hazırlamalıdır. Bu dövr ərzində podratçı kommersiya nöqteyi-nəzərindən qiymətli ehtiyatlar aşkar edərək bu barədə SOCAR-a məlumat verərsə, 6 ay ərzində bu yataqların işlənməsi proqramını hazırlamalı və bundan sonra 3-cü mərhələyə - birbaşa işlənmə prosesinə keçməlidir.
Saziş işlənmə mərhələsinin 23 il davam edəcəyini nəzərdə tutur, lakin bu dövr uzadıla bilər. BP işlənmə mərhələsinin başlanmasından etibarən 36 ay ərzində sənaye hasilatına başlamalıdır.*
N.Abbasova