2021-ci ilin yanvar-iyun aylarında Azərbaycanda 795 ədəd minik avtomobili istehsal edilib. Bu barədə “İnterfaks-Azərbaycan” agentliyinə Dövlət Statistika Komitəsindən məlumat verilib.
2020-ci ilin müvafiq dövrü ilə müqayisədə avtomobil istehsalı 8,9% azalıb.
Yanvarda 96, fevralda 120, martda 192, apreldə 100, mayda 145, iyunda 142 ədəd avtomobil istehsal edilib.
1 iyul 2021-ci il tarixinə anbarlarda 144 ədəd minik avtomobili var.
Cari ilin yanvar-iyun aylarında Azərbaycanda 296 ədəd traktor istehsal edilib ki, bu da 2020-ci ilin 6 ayı ilə müqayisədə 2,8 dəfə çoxdur.
İyulun 1-nə anbarlarda 65 ədəd traktor var.
Azərbaycanda (Neftçala, Gəncə və Naxçıvanda) avtomobil istehsalı üzrə 3 zavod fəaliyyət göstərir. Eyni zamanda, Gəncə avtomobil zavodunda kənd təsərrüfatı texnikası da istehsal olunur. Hazırda avtomobil istehsalı yalnız Neftçala avtomobil zavodunda həyata keçirilir.
Ortamüddətli perspektivdə Azərbaycanda avtomobil istehsalının ildə 5 min ədədə çatdırılması nəzərdə tutulur.
2020-ci ildə Azərbaycanda 1,949 min ədəd avtomobil istehsal olunub ki, bu da 2019-cu ilin göstəricisindən 17,4% azdır. Ötən il respublikada 300 ədəd müxtəlif təyinatlı traktor (azalma 66,9%) istehsal edilib. İstehsalın azalması COVID-19 səbəbindən müəssisələrin fəaliyyətinin məhdudlaşdırılması ilə şərtlənib.*
X.Nəsirzadə