Şuşanın bərpası ilə bağlı 7 ay ərzində artıq çox böyük işlər görülüb, şəhərin su və elektrik enerjisi ilə təchizatı bərpa olunub, yolların tikintisi aparılır. Bu barədə Azərbaycan prezidenti İlham Əliyev bəyan edib.
“İlk səfərim çərçivəsində Şuşanın bərpası ilə bağlı bütün lazımi göstərişlər verildi və yanvar ayından bu günə qədər - 7 ay ərzində artıq çox böyük işlər görülüb”, - Əliyev bazar ertəsi Şuşada Vaqif Poeziya Günlərinin açılış mərasimində çıxışında bildirib.
“Bəli, şəhər hələ ki, dağılmış vəziyyətdədir. Çünki ermənilər nə qədər çalışalar da, yenə də Şuşanı erməni şəhəri kimi təqdim edə bilmədilər və əgər bu, erməni şəhəri idisə, niyə belə vəziyyətdə idi, niyə dağılmış vəziyyətdə idi, niyə bir dənə bina tikilməyib?”, - Əliyev deyib.
Dövlət başçısı bildirib ki, üç-dörd erməni məmurunun yeni villalarından başqa bir dənə də yeni bina tikilməyib.
“Köhnə binalar hamısı dağıdılıb, tarixi binalar dağıdılıb. Şuşanın bərpası yanvarın 14-dən başlanmışdır və qısa müddət ərzində böyük işlər görüldü. İlk növbədə, yol çəkildi. İndi gəldiyiniz Zəfər yolu nə vəziyyətdə idi biz onu yanvarın 14-də gördük. Biz Füzulidən təqribən iki saat yarıma-üç saata gəldik. İndi isə artıq asfalt yol tikilib və bu, elə Zəfər yoludur. Magistral yol da çəkilir. Füzuli şəhərindən tunellər daxil olmaqla, magistral yol tikilir, daha qısa yol olacaq”, - prezident qeyd edib.
Həmçinin, dövlət başçısı bəyan edib ki, Şuşanın elektrik təsərrüfatı bərpa edildi. “Buraya yüksəkgərginlikli xətlər Füzulidən çəkildi, yarımstansiya tikildi. Düşmən Şuşanı tərk edərkən Şuşanın su xətlərini partlatmışdı. Şuşaya suyun verilməsini biz bərpa etdik. İndi iki mənbədən Şuşaya su gəlir”, - prezident deyib.
O cümlədən, Əliyev məlumat verib ki, Şuşada 17 bulaq olub. “Ermənilər 17 bulağın 17-sini də qurutmuşdular. Əgər bu, erməni şəhəri idisə, nə üçün siz bu bulaqları qurudursunuz?”, - dövlət başçısı bildirib.
Həmçinin, prezident qeyd edib ki, Şuşanın tarixi abidələrinin bərpasına start verildi.
“Vaqifin məqbərəsi artıq bərpa edildi. Üç məsciddə təmir-bərpa işləri gedir. Natəvan bulağı bərpa edildi”, - dövlət başçısı məlumat verib. **
B.Rüstəmbəyov