Nazirlər Kabineti un istehsalçılarına subsidiya verilməsi mexanizminin təkmilləşdirilməsinə dair qərar qəbul edib.
“İnterfaks-Azərbaycan” məlumat verir ki, hökumətin saytında dərc olunan qərar əsasən, bu tədbirlərin məqsədi ərzaqlıq buğdanın idxal qiymətinin artmasının ölkə daxilində satılan un və un məmulatlarının qiymətinə mənfi təsirlərinin azaldılmasıdır.
Un istehsalçıları tərəfindən satılan unun hər tonuna görə un istehsalçılarına verilən subsidiyanın hesablanması üçün bir ton unun topdansatış qiymətinin yuxarı həddi 520 manat, un istehsalçısının ölkədaxili xərclər daxil olmaqla marjası bir ton unun topdansatış qiymətinin yuxarı həddinin 25%-i həcmində müəyyən edilib.
Un istehsalçıları tərəfindən satılan unun hər tonuna görə un istehsalçılarına ödənilməli subsidiyanın məbləği müəyyən olunan orta aylıq idxal dəyərinə müəyyən edilən həcmdə un istehsalçısının marjası əlavə edilməklə hesablanmış məbləğlə müəyyən edilən bir ton unun topdansatış qiymətinin yuxarı həddi arasındakı fərq məbləğində müəyyən ediləcək.
İdxal olunan ərzaqlıq buğdanın həcmində ən yüksək paya malik olan ölkə üzrə məlumatlar əsasında 3-cü sinif ərzaqlıq buğdanın orta aylıq qiymətinin üzərinə həmin ölkənin tətbiq etdiyi ixrac rüsumunun orta aylıq məbləğini əlavə edərək, Azərbaycan Respublikası Mərkəzi Bankının həmin dövrün sonuna müəyyən etdiyi rəsmi məzənnə əsasında ərzaqlıq buğdanın orta aylıq idxal dəyərini hesablayacaq.
Un istehsalı ilə məşğul olan şəxslər tərəfindən müəyyən edilən topdansatış qiymətinin yuxarı həddindən artıq qiymətə satıldıqda, subsidiyanın məbləği həmin fərq qədər azaldılacaq.ə
Bu mexanizm 2021-ci il sentyabrın 1-dən qüvvəyə minir və yeni dayanıqlı mexanizm hazırlananadək qüvvədə qalacaq.
Bununla əlaqədar Nazirlər Kabineti nazirliklər və idarələrə beynəlxalq bazarlarda və ölkəı daxilində buğdanın qiymətinin artımına təsirin azaldılması və ərzaqlıq buğda ehtiyatlarının yaradılmasına nəzarət və dayanıqlı tənzimlənməyə dair təkliflər hazırlamağı apşırıb.
Xəbər verildiyi kimi, 2021-ci il 2 fevral tarixində Nazirlər Kabineti ərzaqlıq buğdanın idxal qiymətinin artmasının ölkə daxilində satılan un və un məmulatlarının qiymətinə mənfi təsirlərinin azaldılması məqsədilə un istehsalı ilə məşğul olan şəxslərə satılan unun hər tonuna görə 35 manat məbləğində subsidiya verilməsi haqqında qərar qəbul edib.
Un istehsalçılarına subsidiyaların verilməsi 2021-ci il fevralın 1-dən mayın 1-dək olan dövrü əhatə edirdi. Lakin ötən həftə hökumət bu müddətin 2021-ci il sentyabrın 1-dək uzadılması haqqında qərar qəbul edib.**
B.Rüstəmbəyov