Rusiyanın Perm diyarı rəhbərliyi dəmir yolu ilə Azərbaycandan meyvə və tərəvəzin birbaşa sürətli çatdırılmasını təşkil etmək niyyətindədir.
Perm diyarının nümayəndə heyəti Bakıda işgüzar səfərdə olub, səfər zamanı tərəflər əməkdaşlıq imkanlarını müzakirə ediblər. Onun istiqamətlərindən biri “Aqroexpress” layihəsinin həyata keçirilməsi olacaq. Bu barədəRusiyanın “Kommersant” nəşri yazır.
“Aqroexpress” “Rusiya Dəmir Yolları Logistika” Səhmdar Cəmiyyəti və “Rusiya İxrac Mərkəzi” ASC-nin ekspress konteyner qatarlarından istifadə etməklə kənd təsərrüfatı mallarının çatdırılması üzrə birgə xidmətidir. Layihəyə 2019-cu ildə start verilib. Onun ilkin məqsədi yerli ərzaq məhsullarını Çinə çatdırmaq idi. Layihə çərçivəsində bu gün Türkiyə və MDB ölkələrinə də mallar çatdırılır. Noyabrda Azərbaycan Rusiya ilə nəqliyyat və logistika dəhlizlərinin inkişafına dair strateji sənədlər imzalayaraq layihəyə qoşulub. Rusiya Federasiyasının bir sıra subyektlərində Rusiya-Özbəkistan-Azərbaycan marşrutu üzrə malların həm daşınmasını, həm də qəbulunu formalaşdırmaq üçün sadələşdirilmiş gömrük və fitosanitar prosedurlara malik konteyner qovşaqları yaradılmalıdır. Perm ərazisi pilot ərazilərdən biri kimi müəyyən edilib.
İndi Perm diyarının rəhbərliyi Rusiya Dəmir Yolları ilə birlikdə potensial yüklərin siyahısını və həcmlərini formalaşdırır. Azərbaycana ağac emalı, maşınqayırma və kimya sənayesi məhsulları, gübrələr, plastik, qablaşdırma materialları və digər məhsullar ixrac oluna bilər. İlk növbədə, tərəvəz və meyvələrin idxalı planlaşdırılır.
Layihənin həyata keçirilməsində regional tərəfdaş kimi Perm Diyarının İnkişafı Fondu müəyyən edilib. Fondun baş direktoru Aleksey Burakov öz İnstaqram hesabında layihə çərçivəsində həmçinin Permdə meyvə və tərəvəzlərin saxlanması üçün logistika mərkəzinin tikintisini planlaşdırdığını məlumat verir. Onun sözlərinə görə, Bakıya səfər zamanı obyektin yerləşəcəyi əraziyə dair tələblər müzakirə olunub.
Perm diyarının rəhbərliyinə yaxın olan mənbənin məlumatına görə, obyektin yeri və layihə üçün potensial investorlar hələ müəyyən edilməyib. “Tikintinin məqsədi Asiyadana meyvələrin birbaşa Permə çatdırılmasıdır. Hazırda onlar Moskvada gömrük məntəqələri vasitəsilə regiona çatdırılır. Vəzifə bu yolu birbaşa etməkdir”, - müsahib bildirib. **
R.Əhmədov