2021-ci ildə Azərbaycanın xarici ticarətinin müsbət saldosu $10 milyard 500 milyon 884,43 min təşkil edib ki, bu da 2020-ci ilin göstəricisindən 3,5 dəfə çoxdur. Bu barədə “İnterfaks-Azərbaycan” agentliyinə Dövlət Gömrük Komitəsindən (DGK) məlumat verilib.
2021-ci ildə Azərbaycanın xarici ticarət dövriyyəsi $33 milyard 912 milyon 457,8 min (2020-ci illə müqayisədə artım 38,6% - İF) təşkil edib.
Hesabat dövründə ixracın həcmi $22 milyard 206 milyon 671,12 min (artım 61,6%), idxalın həcmi $11 milyard 705 milyon 786,68 min (artım 9,1%) təşkil edib.
İxracın strukturunda əsas həcm (87,78%) neft-qaz sektoru məhsullarının payına düşüb.
İdxalın strukturunda 16,49% ərzaq məhsullarının, 0,78% tütün və tütün məhsullarının, 4,52% əczaçılıq məhsullarının, 0,39% gübrələrin, 3,31% plastik kütlələr və onlardan hazırlanan məmulatların, 2,77% odun və agac məhsullarının, 2,24% geyim və geyim aksessuarlarının, 7,41% qara metal və ondan hazırlanan məmulatların, 23,49% maşın, mexanizm və elektrik aparatlarının, o cümlədən onların ehtiyat hissələrinin, 11,47% nəqliyyat vasitələri və onların ehtiyat hissələrinin, 0,84% mebelin, 26,29% digər məhsulların payına düşüb.
Xarici ticarət əməliyyatlarında 8,87 min özəl və dövlət müəssisəsi və 56,277 min fiziki şəxs iştirak edib.
Bu dövrdə Azərbaycan 188 ölkə ilə ticarət əməliyyatları həyata keçirib.
Azərbaycan əsas ixrac əməliyyatlarını İtaliya (ümumi ixracın 41,62%-i), Türkiyə (12,69%), Rusiya (4,15%), İsrail (4,04%), Xorvatiya (3,38%), Gürcüstan (2,98%), Almaniya (2,93%), Hindistan (2,68%), Portuqaliya (2,65%), Tunis (2,6%), İspaniya (2,54%) və Ukrayna (2,04%) ilə, əsas idxal əməliyyatlarını isə Rusiya (17,81%), Türkiyə (15,75%), Çin (14,01%), Almaniya (5,42%), Ukrayna (4,02%), ABŞ (3,78%), İtaliya (3,59%), İran (3,4%), Böyük Britaniya (2,32%) və Yaponiya (2,21%) ilə həyata keçirib.
2020-ci ildə Azərbaycanın xarici ticarətinin müsbət saldosu $3 milyard təşkil edib ki, bu da 2019-cu ilin göstəricisindən 49,6% azdır. Azalma COVID-19 pandemiyasının təsiri və dünya bazarlarında neftin qiymətinin ucuzlaşması ilə şərtlənib.*
N.Abbasova