Ermənistan Qarabağ üzrə üçtərəfli bəyanatın müddəalarını pozur və Cənubi Qafqazda sülh və sabitliyin təmin olunmasına əngəllər törədir. Bu barədə Azərbaycanın xarici işlər naziri Ceyhun Bayramov bəyan edib.
Azərbaycan XİN-in məlumatına görə, bu barədə Bayramov Almaniyanın federal kanslerinin xarici və təhlükəsizlik siyasəti üzrə müşaviri Yens Plötner ilə görüş zamanı bəyan edib.
“Görüş zamanı tərəflər, ikitərəfli əməkdaşlıq gündəliyinə daxil olan məsələlər, Azərbaycan və Avropa İttifaqı münasibətləri, habelə regional və beynəlxalq təhlükəsizlik məsələləri ətrafında fikir mübadiləsi aparıblar.Bayramov həmsöhbətinə Cənubi Qafqaz bölgəsində post-münaqişə dövründə mövcud olan vəziyyət, üçtərəfli bəyanatların icrası istiqamətində Azərbaycanın atdığı addımlar, azad edilmiş ərazilərdə həyata keçirilən bərpa və quruculuq işləri, habelə Ermənistan tərəfindən birgə bəyanatın müddəalarının pozulması və sülh və sabitliyin təmin olunmasına əngəllərin törədilməsi ilə bağlı ətraflı məlumat verib”, - XİN-dən bildirilir.
Həmçinin, Bayramov bölgənin gələcək sülh şəraitində inkişafına dair Azərbaycanın baxışı ilə bölüşüb.
“Görüşdə tərəflər, həmçinin Azərbaycanın Avropanın enerji təhlükəsizliyinə verdiyi töhfə, Cənubi Qaz Dəhlizi layihəsinin həyata keçirilməsi (Azərbaycan qazının Avropaya nəqli üzrə - İF), enerji sahəsində əməkdaşlıq perspektivləri və digər qarşılıqlı maraq doğuran məsələləri müzakirə ediblər”, - XİN-in məlumatında deyilir. **
R.Əhmədov