Azərbaycan Təhlükəsizlik Şurasının katibi Ramil Usubov bəyan edib ki, İrəvanda Bakı ilə danışıqlara başlanılmasının zəruriliyini anlamağa başlayırlar.
“Son həftələr Ermənistan rəsmilərinin müxtəlif müzakirə masalarında və sərhədlərin delimitasiya və demarkasiyası ilə bağlı danışıqlarda iştirakı göstərir ki, onlar (Bakı tərəfindən – İF) güzəşt limitinin tükəndiyini anlayırlar”, - Usubov “Azərbaycan” rəsmi nəşrinə müsahibəsində bildirib.
Onun sözlərinə görə, Ermənistanın əsassız iddialardan əl çəkməkdən və regional əməkdaşlıqdan başqa yolu yoxdur.
“Müharibədəki sarsıdıcı məğlubiyyət (2020-ci ilin payızında - İF) Ermənistanın iqtisadi-sosial durumunu tam iflasa sürükləyib, bu dövlətdə daxili siyasi vəziyyət az qala vətəndaş müharibəsi həddinə çatıb. Digər tərəfdən, sülh danışıqlarına etiraz məqsədilə aksiyalar təşkil edən müxalifətin öz məqsədinə çatmayacağı aydın olunca, onlara qoşulanların sayı getdikcə azalır. Həm də bu mitinqlərdə iştirak edənlərin əksəriyyəti yalnız ölkədəki acınacaqlı sosial duruma etirazlarını bildirirlər. Görünən odur ki, Ermənistan cəmiyyətində sülh danışıqlarına həm istək, həm də dəstək var”, - TŞ-nin katibi qeyd edib.
O vurğulayıb ki, erməni xalqı ötənilki seçkilərdə (növbədənkənar parlament seçkilərində - İF) "müharibə partiyası - hərbi xunta"nı təmsil edən müxalifətə yox, Azərbaycanla danışıqlara başlayacağını bəyan edən hakimiyyət partiyasına etimad göstərdi. “Xalq Paşinyana mandatı məhz Azərbaycanla sülh müqaviləsi bağlamaq üçün verib, yəni erməni xalqı düşmənçilikdən bezib, (...) və sabitlik istəyir”, - TŞ-nin katibi bildirib.
Usubov əlavə edib ki, Azərbaycan prezidenti İlham Əliyevin Cənubi Qafqazda formalaşdırdığı yeni təhlükəsizlik sistemində bütün dövlətlərin və xalqların rifahının qorunacağı, inkişafının təmin ediləcəyi, gələcəyi üçün risklərin olmayacağı Ermənistan əhalisinə yaxşı məlumdur. **
E.Şəfiyev