Azərbaycan prezidenti İlham Əliyev İrəvana Qarabağda yeni təxribatlardan çəkinməsi ilə əlaqədar xəbərdarlıq edib, əks halda “Qisas” əməliyyatına bənzər yeni əməliyyatın keçiriləcəyinə söz verib.
“Ermənistan tərəfi növbəti dəfə silahlı təxribata əl atdı və bu hərbi təxribat nəticəsində bir hərbçimiz şəhid oldu... Ancaq hər kəs gördü və görməlidir ki, şəhidimizin qanı yerdə qalmadı. Biz dərhal “Qisas” əməliyyatı keçirərək şəhidimizin qanını aldıq və qarşı tərəfi ciddi cəzalandırdıq”, - Əliyev cümə günü AzTV kanalına müsahibəsində bildirib.
Əliyev qeyd edib ki, bir neçə saat ərzində davam edən “Qisas” əməliyyatı Ermənistan tərəfi üçün cəza tədbiri oldu və “onlar bunu unutmamalıdır”.
“Əgər yenə də buna oxşar təxribat törədilərsə, cavab da eyni olacaq. Heç kim bizə mane ola bilməz, heç kim bizi durdura bilməz”, - Əliyev vurğulayıb.
Prezident əlavə edib ki, Azərbaycan öz torpağında istənilən zaman istənilən əməliyyatı apara bilər.
“Sadəcə olaraq, “Qisas” əməliyyatının çox təsirli, ancaq qısamüddətli olması onu göstərir ki, bizim gücümüz də yerindədir, eyni zamanda, biz yeni müharibə istəmirik. Çünki İkinci Qarabağ müharibəsi gücümüzü göstərdi və biz istədiyimizə hərbi və ondan sonra hərbi-siyasi yollarla nail olduq. Digər arzularımıza da çatacağıq, zaman gələndə onlara da çatacağıq… Dəfələrlə Ermənistana xəbərdarlıq etmişdik ki, odla oynamasınlar, özlərini yaxşı aparsınlar, yeni reallıqları qəbul etsinlər və hərbi təxribatlara əl atmasınlar”, - Əliyev vurğulayıb. **
X.Nəsirzadə