Azərbaycan prezidenti İlham Əliyev bəyan edib ki, Azərbaycanda buğda ilə təminetmə əmsalı 62% təşkil edir, qarşıya bu göstəricini 80%-ə çatdırmaq vəzifəsi qoyulub.
“Özümüzü buğda ilə təminetmə əmsalı Azərbaycanda bu ilin əvvəlinə 62% idi. Məhz bu məqsədlə xüsusi proqram işlənib hazırlandı, yeni növ subsidiyaların tətbiq edilməsinə start verildi və bunun nəticəsində əminəm ki, ərzaqlıq buğdanın Azərbaycanda istehsalı kəskin artacaq. Ancaq bu, vaxt tələb edəcək. Mən hesab edirəm ki, təqribən 3-4 il ərzində biz özümüzü ərzaqlıq buğda ilə 80% səviyyəsində təmin edə bilsək, bu, çox böyük nəticə olacaq”, - Əliyev cümə günü AzTV kanalına müsahibəsində bildirib.
Dövlət başçısı əlavə edib ki, taxılın qiymətinin dünya bazarlarında qalxması bütün ölkələrə təsir göstərir. Ancaq bugünkü vəziyyət ondan ibarətdir ki, təkcə qiymətdən söhbət getmir, eyni zamanda, taxıl qıtlığı yaşanır. Onun sözlərinə görə, Azərbaycan özünü 100% əsas ərzaq məhsulları ilə təmin edə bilmir. Ancaq bu istiqamətdə ardıcıl işlər aparılır.
“Ərzaq mallarının qiymətinin qalxması da Azərbaycana bir növ, - əgər belə demək mümkündürsə, - idxal olunub. Çünki biz hələ də özümüzü tam, yəni, 100% əsas ərzaq məhsulları ilə təmin edə bilmirik. Ancaq bu istiqamətdə ardıcıl işlər aparılır. Məsələn, bizim üçün ənənəvi olmayan heyvandarlıq sahəsində, yəni, - mən sovet dövrünü nəzərdə tuturam, o vaxt heyvandarlıq Azərbaycanda demək olar ki, az inkişaf etmişdi, - bu gün biz özümüzü ət məhsulları ilə 90%, quş əti ilə 80%, süd, süd məhsulları ilə 85% səviyyəsində təmin edirik. Əminəm ki, növbəti 3-5 il ərzində biz yüz faiz səviyyəsinə çıxacağıq, baxmayaraq ki, tələbat da artır. Çünki əhali artır”, - prezident deyib. **
E.Şəfiyev