Azərbaycan İnvestisiya Şirkəti (AİŞ) və İsrailin “OurCrowd” şirkəti Azərbaycanda dəyəri $15 milyon olan birgə layihə həyata keçirməyi planlaşdırır. Bu barədə “İnterfaks-Azərbaycan” agentliyinə İqtisadiyyat Nazirliyindən məlumat verilib.
Xəbər verildiyi kimi, 2022-ci il iyulun 27-də AİŞ və “OurCrowd” şirkəti arasında startap layihələrinin inkişafına dair strateji saziş imzalanıb.
“Dəyəri $15 milyon olan saziş Azərbaycanda startapların inkişafına yönəlib. Sənəddə enerji, səhiyyə, kibertəhlükəsizlik, aqro, qida və təhsil texnologiyaları hədəf sektorları kimi nəzərdə tutulur”, - deyə məlumatda qeyd olunur.
Tərəflər arasında 8 il müddətində həyata keçiriləcək əməkdaşlıq Azərbaycan iqtisadiyyatına və texnoloji inkişafa töhfə verəcək.
“OurCrowd” şirkəti investorlara və təşkilatlara inkişaf etməkdə olan texnologiya şirkətlərinə sərmayə qoymağa imkan yaradan onlayn qlobal vençur investisiya platformasıdır.
“Azərbaycan İnvestisiya Şirkəti” ASC 2006-cı il martın 30-da Azərbaycan prezidentinin fərmanı ilə təsis edilib. Şirkətin nizamnamə kapitalı 160 milyon manata bərabərdir. Şirkətin bütün səhmləri dövlətə məxsusdur. ASC-nin başlıca vəzifəsi iqtisadiyyatın qeyri-neft sektorunda fəaliyyət göstərən ayrı-ayrı ASC-lərdə və başqa kommersiya təşkilatlarında pay almaqla onların uzunmüddətli sərmayələşdirilməsidir.*
R.Əhmədov