Dünya Bankı (DB) iqtisadi islahatların Azərbaycanın yüksək gəlirli ölkələr sırasına daxil olmasına imkan verəcəyini gözləyir. Bunu DB-nin Avropa və Mərkəzi Asiya regionu üzrə vitse-prezidenti Anna Byerde deyib.
Hazırda Azərbaycan orta gəlirli ölkələr sırasındadır.
“Azərbaycanın yüksək gəlirli ölkələr sırasına daxil olacağına şübhə etmirəm”, - deyə o, bu gün Bakıda Azərbaycan və Dünya Bankı arasında tərəfdaşlığın 30-cu ildönümünə həsr olunmuş “Azərbaycan: Dəyişən qlobal iqtisadiyyatda inkişaf perspektivləri” adlı forumda bildirib.
“İnterfaks-Azərbaycan” agentliyinin verdiyi xəbərə görə, vitse-prezident qeyd edib ki, DB bu məqsədə nail olmaq üçün Azərbaycan hökuməti ilə işləməyə hazırdır. “Yaxın aylarda biz Azərbaycan üçün yeni əməkdaşlıq strategiyası üzərində işləməyə başlayacağıq. Bununla əlaqədar ölkənin 2030-cu ilə qədər milli prioritetlərini, həmçinin 2022-2026-cı illərdə sosial-iqtisadi inkişaf strategiyasını müzakirə edəcəyik”, - deyə o bildirib.
Byerde vurğulayıb ki, əməkdaşlıq dövründə DB infrastruktur, energetika, ekologiya, iqtisadiyyatın şaxələndirilməsi, kənd təsərrüfatının inkişafı, ədliyyə sistemində islahatlar və s. sahələrdə 50-dən çox layihənin həyata keçirilməsi üçün Azərbaycana $4,5 milyard məbləğində vəsait ayırıb.
“Azərbaycan son 30 ildə yoxsulluq səviyyəsinin azaldılması istiqamətində böyük uğurlar əldə edib, uğurlu torpaq islahatı həyata keçirib. ( ... ) Bu gün Azərbaycanın milli prioritetləri əsas götürülməklə yeni layihələrin həyata keçirilməsinə ehtiyac var. Biz buna kömək etməyə hazırıq”,-deyə DB-nin vitse-prezidenti əlavə edib.*
A.Əzizov