“Fitch” beynəlxalq reytinq agentliyi Azərbaycan Beynəlxalq Bankı” ASC-nin (ABB) uzunmüddətli emitentin defolt reytinqini “B” səviyyəsindən “BB-” səviyyəsinə qədər yüksəldib.

Dayanıqlılıq reytinqi “b” səviyyəsindən “bb-” səviyyəsinədək yüksəlib.

“Reytinqin iki pillə yüksəlməsi bankın qısa açıq valyuta mövqeyi ilə bağlı problemi həll etməsi ilə əlaqədardır”, - deyə agentliyin məlumatında bildirilir.

Uzunmüddətli reytinq proqnozu Stabil olaraq müəyyənləşdirilib.

“Fitch” qeyd edir ki, iyul ayında bank 2022-ci ilin birinci rübünün sonuna $470 milyon və ya tənzimləyici kapitalın 60%-ni təşkil edən qısa açıq valyuta mövqeyini bağlayıb. Agentlik valyuta risklərinin aradan qaldırılmasını əvvəllər bankın kredit qabiliyyətinə təsir göstərən problemlərin həllində son addım hesab edir.

Agentliyin qiymətləndirmələrinə görə, ABB-nin kredit portfeli yaxşı keyfiyyətə malikdir: dəyərsizləşmiş kreditlərin xüsusi çəkisi ikinci rübün sonuna cəmi 4.1% təşkil edib. Korporativ kredit portfelinin 28%-i tikinti və daşınmaz əmlakın payına düşür.

“Fitch”, həmçinin bankın gəlirlilik səviyyəsinin yaxşı olduğunu qeyd edir. Agentliyin qiymətləndirmələrinə görə, bankın kapital gəlirliliyi yüksək marja və kreditləşmənin yüksək artım tempi (2022-ci ildə ən azı 25% və 2023-cü ildə təxminən 15%) hesabına 2022-2023-cü illərdə 15%-ə qədər təşkil edəcək.

Bank əsasən müştərilərin vəsaitləri hesabına maliyyələşir (2022-ci ilin II rübünün sonuna öhdəliklərin 87%-i). Azərbaycanın bank sistemində bütün kreditlərin 19%-i və depozitlərin 28%-i ABB-nin payına düşür.

ABB 1992-ci ildə yaradılıb və ölkənin ən iri bankıdır. Bankın səhmdarları 1763 hüquqi və fiziki şəxsdir: səhmlərin 96,37%-i dövlətə məxsusdur.

ABB-nin kapitalında Maliyyə Nazirliyinin payı 92,56%, Əmlak Məsələləri Dövlət Xidmətinin payı 3,81% təşkil edir. Bundan başqa, bankın kapitalında 3,06% fiziki şəxslərə (minoritar səhmdarlara), 0,23% “Aqrarkredit” QSC-yə, 0,34% digər hüquqi şəxslərə məxsusdur.*

A.Əzizov