Azərbaycan Müdafiə Nazirliyi sərhəddə atışma nəticəsində Azərbaycan Ordusunun bölmələrinin itki verərək geri çəkilməsi və mövqe dəyişikliyi barədə Ermənistan silahlı qüvvələrinin Baş Qərargahının yaydığı məlumatı təkzib edib.
“Ermənistan silahlı qüvvələrinin bölmələri ilə guya İstisu yaşayış məntəqəsi istiqamətində mövqe atışmaları nəticəsində Azərbaycan Ordusunun bölmələrinin itki verərək geri çəkilməsi və mövqe dəyişikliyi barədə Ermənistan silahlı qüvvələrinin baş qərargah rəisinə istinadən yayılan məlumat yalandır”, - Müdafiə Nazirliyinin mətbuat xidmətindən məlumat verilib.
Bildirilir ki, oktyabrın 24-dən bu günədək əməliyyat şəraitində heç bir dəyişiklik olmayıb.
“Ermənistan silahlı qüvvələrinin baş qərargah rəisinin belə bir açıqlama verməsi onun əməliyyat şəraitindən xəbərsiz olduğunu nümayiş etdirir. Bildiririk ki, əməliyyat şəraitində heç bir dəyişiklik olmayıb və bölmələrimiz əvvəlki mövqelərində döyüş növbətçiliyini davam etdirir”, - məlumatda qeyd olunur. **
N.Abbasova