Azərbaycan və Rusiya arasında nəqliyyat və logistika sahəsində əməkdaşlığın böyük perspektivləri var, investisiya əməkdaşlığı inkişaf edir. Bunu Azərbaycanın baş naziri Əli Əsədov deyib.
“Rusiya şirkətlərinin Azərbaycanın sənaye parklarının layihələrində iştirakı üçün yaxşı perspektivlər var. Bu mərhələdə bir sıra yeni təşəbbüslərlə bağlı danışıqlar davam edir”, - deyə o, bu gün Bakıda rusiyalı həmkarı Mixail Mişustinin iştirakı ilə keçirilən tədbirdə bildirib.
Ə.Əsədov hesab edir ki, nəqliyyat və tranzit Azərbaycan-Rusiya əməkdaşlığının əsas istiqamətidir. Cari ilin 10 ayı ərzində iki ölkə arasında yükdaşımaların həcmi 22%-dən çox artıb.
Baş nazir Şimal-Cənub beynəlxalq nəqliyyat dəhlizinin böyük əhəmiyyətini vurğulayıb.
“Cari ilin 9 ayı ərzində bu marşrutla yükdaşımalar 15%-dən çox artıb, layihənin tam gücü ilə işə salınması regionun inkişafına, ölkələrimizin, eləcə də digər iştirakçı dövlətlərin ticarətinə, tranzitinə və ümumi iqtisadi inkişafına kömək edir. Zəngəzur dəhlizi nəqliyyat və logistika sahəsində yeni imkanlar yarada bilər”, - deyə Ə.Əsədov əlavə edib.
Onun fikrincə, Moskva və Bakı, həmçinin neft-qaz sahəsində də uğurla əməkdaşlıq edir, bərpa olunan enerji mənbələri sahəsində əməkdaşlıq da perspektivli olacaq.
Ə.Əsədov bu gün Rusiya-Azərbaycan əməkdaşlığının strateji tərəfdaşlıq xarakteri daşıdığını vurğulayıb.*
X.Nəsirzadə