Azərbaycan 2022-ci ilin yanvar-oktyabr aylarında 92 min 233,13 ton “Premium Euro-95” markalı avtomobil benzini idxal edib ki, bu da 2021-ci ilin müvafiq dövrünün göstəricisindən 28,7% azdır. Bu barədə “İnterfaks-Azərbaycan” agentliyinə hökumətdən məlumat verilib.
İdxal olunmuş “Premium Euro-95” markalı benzinin dəyəri $94 milyon 838,5 min (azalma 1,5%) təşkil edib.
Rusiyadan $68 milyon 351 min dəyərində (artım 2 dəfə) 65 min 817,6 ton benzin (artım 31,8%) idxal edilib. “Premium Euro-95” markalı benzin idxalının 71,4%-i bu ölkənin payına düşüb.
Rumıniyadan $6 milyon 505,55 min dəyərində 7 min 286,18 ton, Bolqarıstandan $11 milyon 846,11 min dəyərində 10 min 456,7 ton, Türkmənistandan $7 milyon 812,83 min dəyərində 8 min 258,9 ton, Belarusdan $323,02 min dəyərində 413,75 ton benzin idxal edilib.
2022-ci ilin yanvar-oktyabr aylarında Azərbaycana $1 milyon 657,54 min dəyərində (azalma 30,8%) 1 min 354,88 ton “Super Euro-98” markalı avtomobil benzini (azalma 49,5%) idxal edilib.
Rusiyadan $1 milyon 176 min dəyərində 956,62 ton, Rumıniyadan $481,14 min dəyərində 398,26 ton benzin idxal edilib.
Azərbaycan 2021-ci ildə $111 milyon 106,15 min dəyərində (artım 1,9 dəfə) 147 min 412,23 ton “Premium Euro-95” markalı avtomobil benzini (artım 52%) idxal edib.
2021-ci ildə Azərbaycana $2 milyon 395,07 min dəyərində (artım 14,2%) 2 min 684,79 ton (artım 1,1%) “Super Euro-98” avtomobil benzini idxal edilib.
“Premium Euro-95” və “Super Euro-98” markalı benzin növlərinin Azərbaycana idxalına 2014-cü il aprelin 1-dən başlanılıb.
Hazırda daxili bazarda “Premium Euro-95” markalı benzinin 1 litri 2 manat, “Super Euro-98” markalı benzinin 1 litri isə 2,3 manat təşkil edir.**
N.Abbasova