Xarici işlər naziri Ceyhun Bayramov bəyan edib ki, qanunsuz erməni silahlı birləşmələri Azərbaycanın Qarabağ bölgəsindən çıxarılmalıdır.
“Qanunsuz erməni silahlı birləşmələri Qarabağı tərk etməlidir. Bu silahlı birləşmələrin Qarabağdan çıxarılması üçtərəfli bəyanatda (10 noyabr 2020-ci il tarixli – İF) qeyd olunub. Onların bizim ərazimizdə mövcudluğu Azərbaycan üçün qəbuledilməzdir”, - deyə nazir bu gün 2022-ci ilin yekunlarına dair mətbuat konfransında bildirib.
Onun sözlərinə görə, qanunsuz erməni silahlı birləşmələrinin Qarabağda mövcudluğu bölgədə sabitliyi pozan amildir.
XİN başçısı, həmçinin deyib ki, Qarabağın statusu ilə bağlı məsələnin gələcək illərə qalması variantı (Rusiyanın təklifi – İF) Bakı üçün qəbuledilməzdir. “Biz bu məsələ ilə bağlı mövqeyimizi artıq bildirmişik”, - deyə C.Bayramov vurğulayıb.
“Ermənistan tərəfi müxtəlif bəyanatlar verir, onlardan bir çoxu absurddur. Bakı üçün baza prinsipləri (sülh müqaviləsinin – İF) üzrə razılaşmaya nail olmaq vacibdir. (...) Əsas məsələ prosesi çətinləşdirmək yox, hansısa bir irəliləyişə nail olmaqdır”, - deyə o qeyd edib.
Nazir əlavə edib ki, Ermənistanın təqsiri üzündən UNESCO indiyədək Azərbaycanın işğaldan azad olunmuş ərazilərinə missiya göndərə bilmir.
O, həmçinin vurğulayıb ki, Zəngəzur dəhlizinin tikintisinə mane olmaq İrəvanın özünə ziyandır.
C.Bayramov qeyd edib ki, Azərbaycan artıq İran ərazisindən alternativ kommunikasiyaların tikintisinə başlayıb.*
X.Nəsirzadə