Azərbaycan prezidenti İlham Əliyev bəyan edib ki, Ermənistan sülh danıqlarını pozur və hər vasitə ilə Qarabağ mövzusunu sülh müqaviləsinə daxil etməyə çalışır.
“Bəli, Ermənistan tərəfi danışıqları pozur. Ermənistan rəhbərliyinin məsələni uzatmasının bir səbəbi məhz budur. Ona görə ki, onlar qərar qəbul etməli və mahiyyət etibarilə Praqada qeydə alınmış, sonra oktyabrda Soçidə təsdiq edilmiş məsələləri təsbit etməlidirlər. Ərazi bütövlüyünə və suverenliyə, Alma-Ata Bəyannaməsinə istinad edilməsi açıq-aydın onu göstərir ki, ermənilər Qarabağı Azərbaycanın tərkib hissəsi kimi tanıyırlar. Mən həmin görüşdən dərhal sonra bu barədə bəyan etdim ki, bu, bizim uğurumuzdur, çünki Ermənistan, nəhayət, Azərbaycanın ərazi bütövlüyünü və suverenliyini rəsmən tanıyıb”, - Əliyev çərşənbə axşamı Azərbaycan telekanallarına müsahibəsində bildirib.
Eyni zamanda, dövlət başçısının sözlərinə görə, Ermənistan “A” deyərək “B” demək istəmir. “Onlar hər vasitə ilə Qarabağ mövzusunu mümkün sülh müqaviləsinə daxil etməyə çalışır və əslində onu bloklayırlar. Onların Rusiyada hansısa hadisələr baş verməsinə istinad edərək nazirlərin (xarici işlər - İF) orada görüşünə etinasızlıq göstərmələri, ümumiyyətlə, yolverilməz hərəkətdir. Bəs onlar oktyabrın 6-da Praqada keçirilən görüşə nə üçün etinasızlıq göstərmədilər? Axı bundan bir aydan az əvvəl də sərhəddə hadisələr baş verirdi (sentyabrda - İF). (...) Nədənsə erməni tərəfi Praqaya Makronla görüşə getdi, amma Moskvaya getmədi”, - prezident deyib.
“Yəni, incidilmiş tərəf (Ermənistan tərəfi - İF) kimi mövqe tutmaq həm rahat, həm də münasibdir, lakin bu mövqe həm insan üçün, həm də ölkə üçün çox zərərlidir. Necə deyərlər, yazığı gəlmək siyasi xadimlərin arsenalında heç də ən yaxşı vasitə deyil, xüsusən, indi qəbul edilmiş təbirlə desək, bütün bunlar feyk olduğu halda. Düşünürəm ki, bu il çox məsələləri aydınlaşdıracaq”, - Əliyev əlavə edib. **
B.Rüstəmbəyov