Prezident İlham Əliyev İpoteka və Kredit Zəmanət Fondunun (İKZF) xətti ilə sahibkarlara verilən kreditlərə hesablanmış faizlərin subsidiyalaşdırılması mexanizminin tətbiq müddətini 2028-ci ilədək uzadıb.
İ.Əliyev yanvarın 26-da “Azərbaycan Respublikasının İpoteka və Kredit Zəmanət Fondunun fəaliyyətinin təmin edilməsi haqqında” fərman imzalayıb. Sənəd dövlət başçısının saytında dərc olunub.
Bundan əvvəl bu mexanizm 2018-ci il yanvarın 1-dən 2022-ci il dekabrın 31-dək manatla verilmiş kreditlərə şamil edilirdi.
Fərmana əsasən, sözügedən mexanizm artıq 2024-cü il dekabrın 31-dək verilən kreditlərə də şamil olunur.
Bundan başqa, ilkin olaraq subsidiyalaşmanın 2019-2025-ci illəri əhatə edəcəyi nəzərdə tutulurdu. Yeni fərmanla subsidiyaların verilmə müddəti 2019-2027-ci illəri əhatə edəcək.
Kreditlərə hesablanmış faizlərə görə subsidiyanın illik məbləği Nazirlər Kabineti tərəfindən müəyyən edilir.
Prezident İlham Əliyev 2017-ci il dekabrın 26-da “Azərbaycan İpoteka Fondu” ASC-nin ləğv edilməsi və İpoteka və Kredit Zəmanət Fondunun yaradılması haqqında fərman imzalayıb.
Fond aşağıdakı vəzifələri yerinə yetirir: ipoteka, o cümlədən güzəştli ipoteka kreditləşməsinin həyata keçirilməsi; ipoteka kreditləri və sahibkarların müvəkkil banklardan manatla aldıqları kreditlər üzrə təminatların verilməsi; “Elektron ipoteka” sisteminin tətbiq edilməsi.*
A.Əzizov