İqtisadiyyat Nazirliyi yanında Dövlət Vergi Xidməti (DVX) tərəfindən vergi cinayətləri ilə başlanmış cinayət işləri üzrə dövlət büdcəsinə ümumilikdə 44,3 milyon manat məbləğində ziyanın ödətdirilməsi təmin edilib. Bu barədə “İnterfaks-Azərbaycan”a DVX-dən məlumat verilir.
2022-ci il ərzində Dövlət Vergi Xidmətinin müvafiq strukturu tərəfindən Cinayət Məcəlləsinin müvafiq maddələri ilə 527 cinayət işi başlanılıb. İstintaqı tamamlanmış 162 cinayət işindən 81 iş üzrə vergi ödəyiciləri tərəfindən yayındırılmış vergilər ibtidai istintaq zamanı tamamilə ödənildiyindən, onlar barəsində müvafiq qərarlar qəbul edilib, həmin cinayət işləri üzrə əvvəlki illərin ödəmələri də nəzərə alınmaqla dövlət büdcəsinə ümumilikdə 17,1 milyon manat ödənilib.
Bundan başqa, 2022-ci ildə müxtəlif fəaliyyət sahələri üzrə, o cümlədən idxal, topdan və pərakəndə ticarət, istehsal, ictimai iaşə fəaliyyəti göstərən 170 vergi ödəyicisində 317 nəzarət tədbiri keçirilib, həmin tədbirlərin nəticəsi üzrə 413 nöqsan aşkar edilib. Keçirilmiş operativ vergi nəzarəti tədbirlərində vergi ödəyicilərinə ümumilikdə 2,7 milyon manat məbləğində maliyyə sanksiyası tətbiq olunub. Vergi borcu üzrə cinayət tərkibi yaradan və vergi orqanlarından daxil olmuş materiallarla bağlı görülmüş preventiv tədbirlər nəticəsində 2,4 milyon manat vəsait dövlət büdcəsinə ödətdirilib.
DVX 2021-ci ilin yekunları üzrə statistikanı dərc etmir. **
R.Əhmədov