Azərbaycan prezidenti İlham Əliyev Azərbaycanda dini qurumlara 3,1 milyon manat (cari məzənnə ilə $1,82 milyon) məbləğində maliyyə yardımının göstərilməsi haqqındasərəncam imzalayıb.
Dövlət başçısının saytında çərşənbə günü dərc olunan sərəncama əsasən, Qafqaz Müsəlmanları İdarəsinə (QMİ) 1 milyon manat ($588,2 min) ayrılacaq.
Bundan əlavə, Rus Pravoslav Kilsəsinin Bakı və Azərbaycan Yeparxiyası dini qurumuna 350 min manat ($205,9 min), Bakı şəhəri Dağ yəhudiləri dini icmasına 350 min manat, Avropa yəhudilərinin Bakı dini icmasına 350 min manat, Azərbaycan Respublikasında Katolik Kilsəsinin Apostol Prefekturası dini qurumuna 350 min manat və Azərbaycan Respublikasının Alban-Udi xristian dini icmasına 350 min manat ayrılacaq.
Habelə digər qeyri-islam dini icmalarına maddi dəstək məqsədilə Azərbaycan Respublikası Dini Qurumlarla İş üzrə Dövlət Komitəsinin tabeliyində Mənəvi Dəyərlərin Təbliği Fonduna 350 min manat ayrılacaq.
Vəsait Azərbaycanda dini qurumlara maliyyə yardımı göstərmək üçün Azərbaycan Respublikasının 2023-cü il dövlət büdcəsində nəzərdə tutulmuş Azərbaycan Respublikası Prezidentinin ehtiyat fondundan ayrılacaq. **
R.Kərimov