2022-ci ilin yekunları üzrə “Xalq Sığorta” şirkətinin zərəri 12 milyon 225 min 937,97 manat təşkil edib (2021-ci ildə 5 milyon 29 min 191,31 manat xalis mənfəət əldə olunub). Bu barədə “İnterfaks-Azərbaycan” agentliyinə şirkətdən məlumat verilib.
“Xalq Sığorta”nın auditor rəyi ilə təsdiqlənmiş maliyyə hesabatına əsasən, 2022-ci ildə şirkətin gəlirləri 31 milyon 772,388 min manat, o cümlədən sığorta haqları 42 milyon 259,761 min manat (2021-ci illə müqayisədə artım 18,6% - İF), investisiya gəlirləri 1 milyon 945,131 min manat təşkil edib. Hesabat dövründə şirkətin xalis mənfi sığorta ehtiyatları 13 milyon 219,54 min manat təşkil edib, bu da şirkətin ümumi gəlirlərini azaldıb.
2022-ci ildə şirkətin xərcləri 43 milyon 998,325 min manat, o cümlədən sığorta ödənişlərinin həcmi 26 milyon 242,256 min manat (2021-ci illə müqayisədə artım 20,3% - İF), qaytarılan sığorta haqlarının həcmi 5 milyon 184,445 min manat, təkrar sığortaya yönəldilmiş sığorta haqları 1 milyon 982,15 min manat, işlərin aparılma xərcləri 10 milyon 216,623 min manat təşkil edib. Qalan xərclər digər maddələrin payına düşüb.
Ötən il “Xalq Sığorta”nın aktivləri 1,9% - 81 milyon 902,48 min manatadək, öhdəlikləri 52,8% - 39 milyon 910,04 min manatadək artıb, kapitalı isə 22,5% - 41 milyon 992,44 min manatadək azalıb. Şirkətin nizamnamə kapitalı 58 milyon 750,5 min manat səviyyəsində qalıb.
“Xalq Sığorta” şirkəti 2006-cı ilin aprel ayından Azərbaycanın sığorta bazarında fəaliyyət göstərir. Şirkət sığorta haqlarının yığım həcminə görə Azərbaycanın 10 aparıcı şirkəti sırasına daxildir. Səhmdarları bir neçə fiziki şəxsdir.**
X.Nəsirzadə