ATƏT-in fəaliyyətdə olan sədri, Şimali Makedoniyanın xarici işlər naziri Buyar Osmani Ermənistan və Azərbaycanı gərginliyi aradan qaldırmağa çağırıb.
“Ermənistan-Azərbaycan sərhədində baş vermiş insidentlə bağlı xəbər aldım. ATƏT tərəflər arasında kommunikasiyanın mümkün olması, belə insidentlərin qarşısının alınması üçün öz resurslarını təklif edə bilər. Biz əlimizdəki bütün imkanları təqdim edəcəyik ki, dialoq və kommunikasiya mümkün olsun”, - deyə Osmani bu gün Bakıda keçirilən mətbuat konfransında bildirib.
Onun sözlərinə görə, hər iki ölkə üçün sülh vacibdir. “Tərəfləri sülhün təmin edilməsi mexanizmlərindən istifadə etməyə çağırıram. Bütün münaqişələr, o cümlədən Ermənistanla Azərbaycan arasında münaqişə sülh yolu ilə həll olunmalıdır. ATƏT-in sədri kimi sülhün təmin olunmasına yönəlmiş təşəbbüsləri dəstəkləyirəm”, - deyə Osmani qeyd edib.
Nazir, həmçinin Ermənistanla Azərbaycan arasında birbaşa təmasların davam etdirilməsinə tərəfdar olduğunu deyib.
O əlavə edib ki, məqsədi regionda sülh və təhlükəsizliyin təşviqi üçün Azərbaycanla əməkdaşlığın möhkəmləndirilməsi və dərinləşdirilməsidir.*
R.Əhmədov