Azərbaycan dünyada böyük təsirə malikdir. Bunu İsrail Dövlətinin Prezidenti İsxak Hersoq deyib.
“Bizim ortaq baxışımız var, mən Azərbaycanın dünyada və regionda böyük təsirə malik olduğunu görürəm”, - deyə o, mayın 30-da Azərbaycan Respublikasının Prezidenti İlham Əliyevlə mətbuata bəyanatla çıxışı zamanı bildirib.
Hersoqun sözlərinə görə, danışıqlar zamanı Əliyev ona Azərbaycanın Avropanın enerji sektoruna, ümumilikdə regiona, Asiyaya, Yaxın Şərqə təsiri barədə danışıb. “Biz İranın təhlükə və təhdid yaratdığı qlobal, regional təhlükəsizlik strukturuna nəzər saldıq, bu məsələni dərindən müzakirə etdik”, - deyə İsrail Prezidenti əlavə edib.
O, həmçinin qeyd edib ki, Azərbaycana səfəri İsrail xalqı üçün və Azərbaycan xalqı ilə İsrail xalqı arasında birgə əlaqələr baxımından böyük əhəmiyyət kəsb edir.
“Azərbaycana səfər etmək mənim üçün və millətim üçün həyata keçən arzudur. Sülh, ümumi rifah, yaxşı işlərə dair birgə strateji baxışımızla birlikdə, yəhudilərlə müsəlmanlar arasında səmərəli, ədalətli, səmimi, dostcasına dialoq, bizim arzulaya və nümayiş etdirə biləcəyimiz bir baxışdır”, - deyə Hersoq vurğulayıb.*
X.Nəsirzadə