2022-ci ildə “Azərlotereya” ASC xalis mənfəətini 5,4 dəfə - 41 milyon 98,77 min manatadək artırıb. Bu barədə audit olunmuş maliyyə hesabatənda qeyd olunur.
“İnterfaks-Azərbaycan” məlumat verir ki, 2022-ci ildə “Azərlotereya”nın lotereya biletlərinin satışından gəlirləri 2021-ci illə müqayisədə 5,9 dəfə - 258 milyon 163,707 min manata qədər artıb.
Ötən il ərzində satışların maya dəyəri 136 milyon 6,372 min manat (artım 5,9 dəfə) həcmində qiymətləndirilir.
Nəticədə, cəmiyyətin əməliyyat mənfəəti 40milyon 644,988 min manat (artım 3,3 dəfə) təşkil edib.
2022-ci ildə şirkət 332,011 min manat (azalma 15,4 dəfə) mənfəət vergisi ödəyib. Həmçinin, hesabat ilində sadələşdirilmiş vergi üzrə ödənişlər 54 milyon 351,114 min manat (2021-ci ildə belə ödənişlər olmayıb) təşkil edib.
2022-ci ilin sonuna cəmiyyətin aktivləri 87 milyon 685,171 min manata çatıb, bu da 2021-ci ilin sonuna olan göstəricidən 2,8 dəfə çoxdur.
Şirkətin öhdəlikləri 3,2 dəfə artaraq 71 milyon 835,904 min manat təşkil edib.
2022-ci ildə “Azərlotereya”nın kapitalı 62,9% - 15 milyon 849,267 min manatadək artıb. Nizamnamə kapitalı 200 min manata bərabərdir (dəyişməyib). Bölüşdürülməmiş mənfəətin həcmi 15 milyon 649,267 min manat (artım 1,6 dəfə) təşkil edib.
“Azərlotereya” ASC Azərbaycan Prezidentinin 23 noyabr 2001-ci il tarixli fərmanı ilə yaradılıb. Şirkətin təsisçisi İqtisadiyyat Nazirliyidir. “Azərlotereya” ölkənin lotereya bazarında inhisarçıdır. İqtisadiyyat Nazirliyi və Türkiyənin “Demirören Şans Oyunları Yatırımları A.Ş.” şirkəti 2021-ci il fevralın 27-də “Azərlotereya” ASC-nin “YMT Sans B.V.” şirkətinə (“Demirören Şans Oyunları Yatırımları A.Ş.” şirkətinin törəmə cəmiyyəti) müqavilə əsasında idarəetməyə verilməsi haqqında” saziş imzalayıb.**
X.Nəsirzadə