Baş prokuror Kamran Əliyev Ermənistanla Naxçıvan Muxtar Respublikası (NMR) arasında yerləşən Arazdəyən kəndində (Yerasx, Ermənistan) metallurgiya zavodunun inşasını ciddi cinayət adlandırıb.
Əliyev Naxçıvanda keçirilən Azərbaycan və Türkiyə prokurorluqlarının sərhədyanı əməkdaşlığı konfransında çıxışı zamanı bəyan edib ki, “hazırda Arazdəyən kəndində $70 milyon dəyərində iri metallurgiya zavodunun inşası və zəhərli maddələrin Araz çayına tökülməsi ciddi cinayətdir”.
"Biz bunu dəfələrlə müzakirə etmişik və ötən iki gün ərzində türkiyəli həmkarlarımızla yenə də müzakirə etdik. Araz çayının (Cənubi Qafqazın ikinci böyük çayı - İF) çirklənməsi su ehtiyatlarının keyfiyyətinə, həmçinin bu zonada olan fauna və floraya də birbaşa təsir göstərir. Bundan başqa, Sədərək rayonunun yaxınlığında (NMR - İF) tikiləcək zavodun fəaliyyəti nəticəsində təkcə Araz çayı çirkləndirilməyəcək, həmçinin havaya buraxılan zəhərli qaz fauna və floraya ciddi təsir göstərəcək”, - Baş prokuror qeyd edib.
O əlavə edib ki, ümumilikdə bu obyektin fəaliyyəti ətraf mühitə ciddi zərər vuracaq.
“Ermənistan yenə beynəlxalq hüquq norma və prinsiplərini, xüsusilə də BMT-nin Avropa İqtisadi Komissiyasının Transsərhəd kontekstdə ətraf mühitə təsirin qiymətləndirilməsi haqqında Konvensiyasının (Espo Konvensiyası) müddəalarını kobud surətdə pozur. Bu, Ermənistanın beynəlxalq ekoloji hüquq normalarına riayət etməməsi kimi ilk hal deyil", - Əliyev bəyan edib. **
R.Kərimov