Azad edilmiş ərazilərdə (Qarabağ və Şərqi Zəngəzur - İF) Azərbaycan Ordusunun mühəndis-istehkam bölmələri tərəfindən 32 min hektardan artıq ərazi minalardan təmizlənib. Bu barədə Müdafiə Nazirliyindn məlumat verilib.
“Azərbaycan Ordusunun Mühəndis Qoşunlarının hissə və bölmələrinin fəaliyyəti nəticəsində azad edilmiş ərazilərdə cari ilin iyul ayı ərzində 610 hektaradək ərazi minalardan tam təmizlənib.
İşğaldan azad edilmiş ərazilərdə bu günə kimi mühəndis-istehkam bölmələri tərəfindən 32285 hektar ərazi mina və partlamamış döyüş sursatlarından təmizlənib”, - nazirliyin məlumatında deyilir.
Məlumata görə, ümumilikdə 10207 ədəd piyada əleyhinə, 2580 ədəd tank əleyhinə mina və 10447 ədəd partlamamış döyüş sursatı aşkarlanaraq məhv edilib.
Bundan başqa, nazirlikdən əlavə ediblər ki, mürəkkəb relyefli, o cümlədən çətin keçilən qayalıq ərazilərdə avtomobil və döyüş texnikası kolonlarının təhlükəsiz hərəkətinin təmin edilməsi məqsədilə digər dövlət qurumları ilə qarşılıqlı fəaliyyət nəticəsində yeni təminat yolları çəkilib.
“Cari ilin iyul ayı ərzində 70 km-dən artıq mövcud təminat yolları təkmilləşdirilərək bərpa edilib”, - MN-dən məlumat verilir.
Həmçinin qeyd olunub ki, Mina təmizlənmə işlərində əsas səylər azad edilmiş ərazilərdə yaşayış məntəqələri, əkin sahələri, yollar və infrastruktur obyektlərinə yönəldilib. Əlavə edilib ki, ərazilərdə mühəndis təminatı üzrə zəruri tədbirlər plana uyğun davam etdirilir. **
R.Kərimov