“AzerGold” QSC-nin qızıl və gümüşün beynəlxalq bazarda satışından indiyədək ümumi gəliri 2 milyard 758,495 min manat (cari məzənnə ilə $1,622 milyarddan çox) təşkil edib.
“AzerGold”un qızıl və gümüşün beynəlxalq bazarda satışı nəticəsində gəliri 1 milyard 716 min 495 manata ($1 milyard 9 milyon – İF) çatıb. Bu göstərici 79-cu ixrac əməliyyatı nəticəsində əldə olunub, nəticədə beynəlxalq bazarda 3,7 min unsiya qızıl, 11,4 min unsiya gümüş realizə edilib və 12,8 milyon manat satış gəliri əldə edilib. QSC tərəfindən bütün fəaliyyət dövrü ərzində ixrac edilən qızılın həcmi 361,9 min unsiya, gümüşün həcmi isə 723,5 min unsiyaya çatıb”, - cəmiyyətin məlumatında deyilir.
“AzerGold”un yerli zərgərlik bazarının inkişafı məqsədilə daxili bazarda pərakəndə və xammal formasında satışlarını davam etdirən QSC-nin ümumi satış gəlirləri 1 milyard 42 milyon manatı ($613 milyon - İF). üstələyib. Ötən dövr ərzində 11,5 min unsiya qızıl, 77 min unsiya gümüş daxili bazarda realizə edilib.
Hazırda “AzerGold” yerüstü işlənmə mərhələsi çərçivəsində “Çovdar” yatağından, birinci mərhələ çərçivəsində “Ağyoxuş” yatağından (2020-ci ilin noyabr ayından etibarən), eləcə də “Mərəh” yatağından (2021-ci il iyulun 23-dən) qızıl hasilatı və ixracını həyata keçirir.
Xəbər veridilyi kimi, “AzerGold” 2022-ci ildə 62,1 min unsiya qızıl (artım 0,9%) və 223,1 min unsiya gümüş (artım 65,9%) hasil edib. 2023-cü ildə qızıl hasilatı 62,5 min unsiya, gümüş hasilatı 108,3 min unsiya həcmində nəzərdə tutulur.
“AzerGold” QSC Prezident İlham Əliyevin 11 fevral 2015-ci il tarixli fərmanı ilə yaradılıb. “AzerGold” Azərbaycanda qızıl və gümüş hasilatı ilə məşğul olan iki şirkətdən biridir.
Cəmiyyət Qaradağ, Çovdar, Göydağ, Dağkəsəmən filiz sahələrinin, Köhnəmədən sahəsinin və Kürəkçay hövzəsi yataqlarının öyrənilməsi, tədqiqi, kəşfiyyatı, işlənməsi və idarə olunması ilə məşğul olur.
Bundan başqa, Prezident İlham Əliyevin 2020-ci ilin avqust ayında imzaladığı sərəncamla “AzerGold” QSC-yə ölkə ərazisində dəmir filizi yataqlarının öyrənilməsini, tədqiqini, kəşfiyyatını, işlənilməsini və idarə olunmasını, bu sahədə yeni texnologiyaların tətbiqini, maddi-texniki bazanın müasirləşdirilməsini və ondan səmərəli istifadəni, habelə bu sahənin inkişafı ilə bağlı digər işlərin yerinə yetirilməsini təmin etmək tapşırılıb.**
N.Abbasova