Avropa İttifaqının (Aİ) Xarici siyasət və Təhlükəsizlik məsələləri üzrə ali nümayəndəsi Cozep Borrellin mətbuat katibi Peter Stano bəyan edib ki, Brüssel Laçın yolu məsələsi ilə bağlı Azərbaycan və Ermənistanla məsləhətləşmələr aparır.
“Avropa İttifaqı bu (Laçın yolu ətrafında - İF) vəziyyətə görə məsuliyyət daşımır. Bu məsələnin həlli səlahiyyətimiz xaricindədir. Münaqişə tərəfləri həll yolu tapmalıdırlar. Bu, onların əhalisinin xeyrinədir”, - Stano çərşənbə axşamı Brüsseldə brifinqdə bildirib.
O izah edib ki, Aİ bu məqsədlə Azərbaycan və Ermənistanla məsləhətləşmələr aparır.
Onun sözlərinə görə, əvvəlki kimi, Brüsseldə ümid edirlər ki, hər iki tərəf bu həll yolunu tapacaq.
“Aİ Şurasının prezidenti Şarl Mişelin, regionda xüsusu nümayəndəmiz, o cümlədən ali nümayəndə Borrellin iştirakı ilə səylərimizi davam etdiririk. Bu şəxslər maraqlı tərəflərlə, onların əhalisinin xeyrinə həll yolu tapmaları üçün fəal dialoq aparırlar”, - Stano davam edib. **