Azərbaycan Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev hesab edir ki, İrəvan keçmişdə törətdiyi cinayətlərə görə Bakıdan üzr istəsə, Azərbaycanla Ermənistan arasında barışıq mümkündür.
“Düşünürəm ki, barışıq mümkündür, lakin bu, əlbəttə, vaxt tələb edəcək. Bu prosesdə Ermənistan tərəfindən çox şey asılıdır”, - deyə Hacıyev “Arab News” qəzetinə müsahibəsində bildirib.
“İnterfaks-Azərbaycan” agentliyinin verdiyi xəbərə görə, Əliyevin köməkçisi qeyd edib ki, Azərbaycanda yaxınlarını itirmiş, qaçqın və məcburi köçkün vəziyyətinə düşmüş çox ailə var və onlar doğma yurdlarına qayıdarkən evlərinin əvəzinə xarabalıqlar görürlər.
“Bu, asan deyil və onlar cavab axtarırlar. Cavab yoxdur, çünki Ermənistan tərəfdən heç kimin “Bizi bağışlayın, bütün səhvlərimizə görə üzr istəyirik” deməyə cəsarəti çatmayıb”, - deyə o vurğulayıb.
“Ermənistanın baş naziri erməni xalqı və Ermənistan hökuməti adından “Məni bağışlayın?” deməyə hazırdırmı? Düşünürəm ki, bu, çox şeyi dəyişə bilər”, - deyə Hacıyev bildirib.
“Ermənistan 4000 azərbaycanlının kütləvi məzarlığı ilə bağlı məlumat verməkdən niyə imtina edir? Qaçqın çadırlarında böyüyən bir milyon azərbaycanlının həyatından qoparılan 30 ilin əvəzini kim ödəyəcək?”, - deyə prezidentin köməkçisi diqqətə çatdırıb.*
R.Kərimov