Cümə axşamı Azərbaycanın xarici işlər naziri Ceyhun Bayramov ilə Böyük Britaniyanın Avropa regionu üzrə dövlət naziri Leo Dokerti arasında telefon danışığı baş tutub.
“Telefon danışığı zamanı iki ölkə arasında əməkdaşlıq gündəliyi, habelə bölgədə mövcud vəziyyət müzakirə olunub. Bayramov, Azərbaycan tərəfindən Qarabağ bölgəsində görülən lokal anti-terror tədbirlərindən sonra bölgədə mövcud vəziyyət barədə qarşı tərəfi ətraflı məlumatlandırıb”, - XİN-in məlumatında deyilir.
Bayramov həmçinin antiterror tədbirləri nəticəsində regionda sülh və sabitliyə təhdid törədən erməni silahlı qüvvələrinin mövcudluğuna son qoyulması barədə həmkarını məlumatlandırıb.
Nazirin sözlərinə görə, onların tərksilah edilməs Azərbaycanın suveren ərazilərində hərbiləşmənin dəhşətli səviyyəsini bir daha nümayiş etdirdi.
XİN başçısı Azərbaycanın Qarabağ bölgəsində yaşayan erməni sakinlərin cəmiyyətimizə reinteqrasiyasına təkan verdiyi, həmin sakinlərin ehtiyaclarının qarşılanması istiqamətində tərəfimizdən əməli addımların atıldığı bildirilib.
“Ermənistan tərəfinin guya bölgədə “etnik təmizləmə”nin həyata keçirildiyi ilə bağlı iddiaları həqiqətə uyğun deyil”, - Bayramov vurğulayıb.
Bayramov əlavə edib ki, Azərbaycan Ermənistanla normallaşma və sülh prosesinə sadiqdir.
XİN-dən vurğualnır ki, tərəflər həmçinin qarşılıqlı maraq doğuran digər məsələlər ətrafında fikir mübadiləsi aparıblar. **
X.Nəsirzadə