Aİ-nin Cənubi Qafqaz və Gürcüstanda böhran üzrə xüsusi nümayəndəsi Toivo Klaar məlumat verib ki, Bakı və İrəvanda danışıqlar aparıb, Azərbaycanla Ermənistan arasında münasibətlərin normallaşması çərçivəsində gələcək addımlar müzakirə olunub.
“Hərtərəfli normallaşma istiqamətində növbəti addımları müzakirə etdiyim Bakı və İrəvandan qayıtdım. Azərbaycanla Ermənistanın müsbət və razılaşdırılmış gündəliyə sadiq qalması vacibdir. Bu qarşılıqlı təmasın bu ayın sonunda Brüsseldə keçiriləcək yüksək səviyyəli görüşdə möhkəmlənəcəyini gözləyirik”, - Klaar “X” sosial şəbəkəsində yazıb.
Xəbər verildiyi kimi, oktyabrın sonunda Brüsseldə Azərbaycan prezidenti İlham Əliyev, Ermənistanın baş naziri Nikol Paşinyan və Aİ Şurasının prezidenti Şarl Mişelin üçtətəfli görüşü planlaşdırılır. **
R.Əhmədov