"MİDA" MMC Füzuli şəhərində inşa olunan yaşayış kompleksində daldalanacaqların tikintisi işlərinə “Katri” MMC-ni cəlb edib.
“İnterfaks-Azərbaycan” dövlət satınalmalar portalına istinadən məlumat verir ki, tərəflər arasında imzalanmış müqavilənin dəyəri 1 milyon 289.745 min manatdır.
Bütün işləri “Katri” 6 mart 2024-cü ilədək sona çatdırmalıdır.
Xəbər verildiyi kimi, ümumi sahəsi 8,9 hektar olan Füzuli yaşayış kompleksi 38 binadan ibarətdir. Dördmərtəbəli, beşmərtəbəli, altımərtəbəli və yeddimərtəbəli binalarda ümumilikdə 846 mənzil olacaq. Onların 318-nin ikiotaqlı, 430-nun üçotaqlı, 98-nin isə dördotaqlı olması nəzərdə tutulur. İkiotaqlı mənzillərin sahəsi 54-68 kvadratmetr, üçotaqlı mənzillərin sahəsi 71-109 kvadratmetr, dördotaqlı mənzillərin sahəsi isə 92-108 kvadratmetr təşkil edəcək.
Kompleksdə bütün mənzillər tam təmirli olacaq, mətbəx mebeli və qaz plitəsi, su, qaz və elektrik sayğacları ilə təchiz ediləcək. Bütün binalar liftlə və mərkəzləşdirilmiş qazanxana vasitəsilə istiliklə təmin ediləcək.
Yaşayış binaları ilə yanaşı, ərazidə park, sosial-məişət obyektləri, yeraltı və yerüstü avtodayanacaqlar, istirahət guşələri, uşaq oyun və idman meydançaları da istifadəyə veriləcək. **
B.Rüstəmbəyov